Yn leit ia aireng ki 2 ngut ki heprit sha ka Youth World Muaythai C’ships ha Thailand 

Syllad | The Rising MeghalayaSeptember 7, 2024

Ki arngut ki heprit na ka shnong Umsaw Nongkharai, Ribhoi District ki la shah jied ban leit ïashim bynta ha ka rynsan ïa kura ba la tip kum ka ‘IFMA Youth World Muay Thai Championship’ ka ban long ha nongbah Bangkok,Thailand.

Kine ki heprit kiba la shah jied ban leit ïakhun sha katei ka rynsan ki kynthup ïa ka Dasngewtngen Nongrum bad ka Ailin Grace Kharbyngar ki ban sa mih na kane ka jylla ban leit iakhun sha katei ka rynsan iakop ka ban sa long naduh ka 11 haduh ka 21 tarik Nailur, 2024.

Ha shwa ba kine ki arngut ki heprit kin leit ia aireng sha katei ka ri, na ka liang ka Dorbar shnong Umsaw Nongkharai ki la pynlong ïa ka program kitbok kitwriang ïa kitei ki heprit ha kaba ki la ïoh ruh ban aiti ïa ka song pisa kum ka dak ban kyrshan lem ha ka leit ka wan ka jong ki.

Ha kane ka sngi la ïa don lang ruh naduh u Bah A Sun, Rangbah Shnong ka shnong Umsaw Nongkharai u ba dei ruh kum u nonghikai na ka bynta ki hynnah ïalehkai Muay Thai, u Bah Tony Shylla Secretary Shnong, ki kmie ki kpa lem bad ki khun samla jong ka shnong.

Na ka liang ki nongïalam shnong ki la ai ka jingkitbok kitwriang ïa kine ki heprit ki ban leit ïa shim bynta ha katei ka rynsan ïa kura ba kin don barabor ha ka met kaba shait kaba khlaiñ khamtam haba ki leit ban mih shabar jong ka ri bad ruh ban wanrah ia ka jingjop kaba donburom.