Yn leit ia aireng ka samla Angelia N Marweiñ sha ka jingiakop Femina Miss India 2024

Syllad | The Rising MeghalayaAugust 28, 2024

Ka samla Angelia N Marweiñ 24 snem rta kaba la pyndep ia ka jingpule Political Science na Shillong ka la shah jied ban leit mihkhmat ia ka jylla Meghalaya sha ka jingiakop thei bhabriew ‘Femina Miss India 2024’.  

Ha kane ka jingiakop thei bhabriew ‘Femina Miss India 2024’ ia kaba la pynlong ha ka sien kaba 60 yn sakhi ruh ia ka jingwan iashim bynta na baroh ki 29 tylli ki Jylla bad ki Union Territories jong ka Ri India. 

Haba kren sha ki lad pathai khubor, ka samla Angelia ka la ong, “Nga sngewkmen bad sngew burom shibun ban ioh mihkhmat ïa ka Meghalaya ha ka jingiakob Femina Miss India 2024 ka ban wan.”

“Kane ka dei ka jingphohsniew kaba la wan urlong shisha na ka bynta jong nga, bad ka long ruh ka jingkyrkhu ban ioh lad ban pyni ym tang ia ka jingiaid lynti ba shimet, hynrei ruh ia ka kolshor ba riewspah ka jylla jong nga ha kaba kum kane ka rynsan kaba heh,” ka la ong. Ka Angelia ka dei ruh kaba don ia ka jngngeit bad burom kyrpang ia ka jinglong kyrpang jong ki kynthei bad ka jingiaryngkat hapdeng shynrang bad kynthei.

Haba kylli halor ka jingpynkhreh ka jong ka, ka Angelia ka la ong, “Kum ka ‘riew thymmai ha kane ka rynsan ka la pynshlur ia nga ba ngan trei shitom. Nga la pynleit jingmut ha man la ki bynta jong ka jingiakop bad ruh ban don ia ka jngsngewthuh halor ka jingmut ban long ka Miss India.” Ka Angelia kadei ruh ka samla kaba don ia ka jingsngewtynnad ban rwai, ban shad bad kiwei pat ki jait jingialehkai.

Halor ka jingangnud lyngba kane ka rynsan, ka Angelia ka la ong, “Nga thmu ban pyndonkam ia kane ka kabu ban khring ia ki jingmut jingpyrkhat sha ki mat kiba kongsan, khamtam kito kiba ktah ïa ka imlang sahlang jong ka jaidbynriew jong nga ha Meghalaya, kum ka pule puthi, ka jingpynkupbor ïa ki kynthei, bad ka jingpynneh pynsah ïa ka kolshor.”

Ka lahduh jong ka Femina Miss India 2024 kan ioh lad ban leit mihkhmat ia ka Ri India ha ka jingiakop Miss World kaba 73. Ia ka pangsniat, Miss India 2024, yn pynkup da ka Miss India ka Nandini Gupta na Rajasthan.