Yn kyrpad ka Sorkar ia ka Assam ba kan pynphai ia ka Block-I bad II sha Meghalaya: Dy CM

Syllad | The Rising MeghalayaJuly 18, 2025

U Symbud Myntri Rangbah ka Jylla u ba khmih ia ka Tnad kam Pohiing (Police) u Bah Prestone Tynsong haka sngi Thohdieng u la ban jur halor ka rai jong ka sorkar ban kyrpad ia ka sorkar Assam ba kan pynphai biang ia ka Block-I bad Block II sha Meghalaya.

U Bah Prestone uba dei ruh u Chairman ka Regional Committee mynta u dang ap ia ka jubab na ka Committee jong ka Assam na ka bynta ban pynlong ryngkat lang ia ka jingleit jurip ia ki jaka khappud.

Haba kren sha ki lad pathai khubor, u Bah Prestone u la pynpaw ia ka jingangnud bad ka jinglong lakloi ban pynlong ia ka jingleit jurip ia ki jaka khappud ha kano kano ka por bad leh noh hadien jong ka lyiur.

“Ngan dang ioh ia ka tarik na ka Committee na Assam namar ha Ri Bhoi ngi don ar lai ngut ki Chairman na ka liang ka Assam katba na kane ka liang dei tang ma nga u Chairman. Kumta nga dang ap ia ka tarik ka ba kin buh ma ki. Ha kajuh ka por ka elekshon jong ki kan long ha u snem u ban wan, ngam tip la kin lah ne em ban pyllait ia ka por ba kordor jong ki na ka bynta ban pynlong ia kane ka jingleit jurip lang, nga dang ap mynta ia ka jubab na ki,” u la ong.

“Na ka liang ka jong ngi, ngi long kiba la kloi. Ha ka jingshisha ngi kwah ban pynlong ia kane ka jingjurip ha kano kano ka por bad ka khyllipmat. Hooid ha ka por lyiur ngi don khyndiat ki jingshem jingeh hynrei shwa ban kut u Nailur bad hadien ba la kut la lyiur, nga tharai ba wat na ka liang ka Assam ruh kin long kiba la kloi ban leit jurip,” u la bynrap.

Haba kylli u Symbud Myntri Rangbah u la kdew halor ka jingpynbna jong u snem 1950, kaba kren ba ka jingpynkynriah ia ki katto katne ki jaka na Meghalaya sha Karbi Anglong. U la ong ba kane ka kam mynta ka iaid tawiar halor ka jingpynphai biang ia ka Block I bad Block II shapoh Meghalaya.

“Na ka liang ka Sorkar kaei kaba ngi kwah ka long ban kyrpad ia ka sorkar Assam ba kan pynphai pat ia ka Block I bad II sha Meghalaya. Nga tharai kata ka dei ka mat kaba hakhmat eh kaba ngi iakren.”

Kumjuh u Bah Prestone u la ban jur halor ka jingdonkam jong baroh arliang ban pynneh ia ka status quo bad ban wanrah ia ka jinglong jingman kaba jai jai khnang ban lah ban pynbeit ia ka kam iakajia pud.

Nalor kata u la kyntu ruh ia ki nongshong shnong na baroh arliang ba kin pynneh ia ka shongsuk shongsain, da kaba pynpaw ruh ba ka kam iakajia pud ka dei kaba la iaid mynta la bun pateng.

Katkum ka jingong jong u ia kane ka mat yn lah ban pynbeit tang lyngba ka jingleit jurip lang bad ka jingiakren ia pynbeit hapdeng ki Committee ba la ialam da ki Myntri Rangbah na baroh kine ki ar jylla.

“Kane ka jingeh kan dang iai bteng tad haduh ba ki Committee kin shong iakren halor kine ki jingeh, hynrei ka jingkyrpad ka jong ngi ia baroh arliang kata la ki dei na Assam ne Meghalaya ba kin sngewbha ban pynneh ia ka status quo,” ong u Symbud Myntri Rangbah.