Yn kyntiew kyrdan ka Sorkar ia 6 tylli ki Sec School sha ka HSS bad sdang ia ki lain pule thymmai

Syllad | The Rising MeghalayaMay 2, 2025

Ka kynhun Myntri ka sorkar jylla haka 1 tarik Jymmang ka la mynjur ban kyntiew kyrdan noh ia ki hynriew tylli ki Government Secondary School sha ki Higher Secondary bad ban sdang noh ia ki lain pule bathymmai ne stream ha ki khatwei tylli ki Higher Secondary School.

Haba kren sha ki lad pathai khubor, u Myntri bad Nongaiktien ka sorkar u Bah Paul Lyngdoh u la ong, “Baroh ki don hynriew tylli ki skul Secondary ka sorkar ia kiba yn kyntiew noh sha ka kyrdan Higher Secondary School bad 11 tylli ki skul ki bym don ia ki katto katne ki lain pule mynta kin ioh ban sdang noh ia ki lain pule bathymmai.”

“Ka jingpynlut pynsep na ka bynta ka jingsdang ia kine ki lain pule bathymmai bad na ka bynta ka jingkyntiew kyrdan ia ki skul sorkar kan long kumba T.10 klur shi snem,” u la bynrap.

U Myntri u la ong ba ka jingshim ia kane ka rai ka long hadien ba ka don ka jingduna ban pynrung klas ha ka kyrdan pule jong ka klas XI, kaba long tang 12,000 seat bad ruh ka jingbun palat kiba pynleit jingmut ban leit pule ha ki skul Higher Secondary khamtam ha ki jaka sor ha Rilum Khasi bad Jaintia.

“Kane ka jingkyntiew kyrdan ia kine ki skul kan iarap ban lah ban pyndap ia kane ka jingduna da kaba ioh pynrung klas sa kumba 9000 ngut,” ong u Bah Paul.

Kine ki hynriew tylli ki skul kiba yn kyntiew noh sha ka kyrdan Higher Secondary ki long ka  Rymbai Secondary School, Umthlong-Nongthliew Secondary School, Nongtalang Secondary School, Tirot Sing Memorial Secondary School, Laitkynsew, Tura Public School bad Jowai Public School.

Nalor kata u Bah Paul u pyntip ba ka sorkar ka la mynjur ruh ban sdang noh ia ki lain pule bathymmai ha ki katto katne ki Higher Secondary School ki bym pat don mynta ia kine ki lain pule.

“Kine kin long ka Science Stream hapoh Tirot Sing Memorial Govt Higher Secondary School, Nongkhlaw, ka Commerce Stream ha Govt Boys Higher Secondary School, Tura, Dalu Govt Secondary School, West Garo Hills, Baghmara Higher Secondary School, Govt Boys’ Higher Secondary School, Jowai bad Sohkha Govt Higher Secondary School. Kine ki skul ia mynta ki don tang ki Arts Stream bad Science Stream bad mynta kin ioh noh sa ia ka lain pule Commerce,” u la ong.

“Ia ka Arts Stream yn wanrah hapoh Jirang Higher Secondary School, Ri Bhoi, Resubelpara Higher Secondary School, Maharam Higher Secondary School, Mawkyrwat.  Ha ka Science bad Commerce Stream ngin bynrap hapoh United Kharkutta Govt Higher Secondary School, North Garo Hills, Malangkona Higher Secondary School ki ban ioh noh mynta ia ka lain pule Science,” bynrap u Myntri.