Yn kyntiew ka sorkar Jylla ia ka jinglum khajna lyngba ka tnat Excise ka ban kot sha ka T. 50 klur

Syllad | The Rising MeghalayaNovember 1, 2023

Ka Sorkar Jylla haka 31 tarik Risaw kala mynjur ban pynkylla ia ki kyndon jong ka Meghalaya Excise Amendment Rules, 2021 khnang ban pynthikna ba ka Tnat Excise kan ioh lum ia ka khajna ka ban kot sa T. 50 klur lyngba ka Kyiad.

Haba kren sha ki lad pathai khubor, u Myntri sorkar u Marcuise N Marak u la ong, “Ki don shibun bah ki jait brand jong ka kyiad ha ka jylla jong ngi, bad ngi la pynbynta biang ia ki khnang ban ioh lum ia ka khajna kaba biang. Mynta kin don noh tang san jait ha ka jaka jong ki hynriew jait ki brand.”

Ula ong ba ka khajna excise duty la khmih lynti ba kan kiew da 15% bad ba ka Jylla kan dang  ioh shuh  ia ka khajna ka ban long kumba T.50 klur ha ka shisnem. Ia mynta,ka jingioh lum khajna na ka kyiad ka long T. 350 klur shisnem.

Na ka liang u Commissioner & Secretary ka Tnat Excise, u Sanjay Goyal ula ong ba ka jingioh lum khajna jong ka Tnad ha kine ki san snem bala leit noh, kala kot ia ka T.1200 klur.

Ia kane ka rai la shim ha ka jingialang jong ka Kynhun Myntri kaba la pyniaid da u Myntri Rangbah ka Jylla Conrad K sangma.