Yn khot iakren ka Sorkar iaka HPC hadien ka shuti puja

Syllad | The Rising MeghalayaOctober 6, 2023

U Symbud Myntri Rangbah ka jylla uba khmih ia ka Tnat Urban Affairs, u Bah Sniawbhalang Dhar haka sngi Palei u la pyntip ba ka sorkar jylla kan khot ia ka Harijan Panchayat Committee (HPC) na ka bynta ban pynlong ia ka jingiakren halor ka mat kaba iadei bad ka jingpynkynriah ia ki 342 tylli ki longiing na Them Metor (Them Iew Mawlong) hadien ka shuti puja.

“Hadien ka shuti Puta, Ngan khot biang ia ka HPC na ka bynta ban pynlong ia ka jingiakren.Baroh kiei kiei ki iaid beit iaid ryntih ha ka lynti kaba dei,” ong u Myntri haba kren sha ki lad pathai khubor.

U la ong ruh ba na ka liang ka iingbishar Meghalaya High Court lyngba ki jingpynmih ia kiba bun tylli ki hukum ka la kyrpad ia ka sorkar jylla kumjuh ia ka HPC ba kin shim ia ki sienjam kiba lah ban pynkut noh kloi ia ki kynrum kynram kiba iadei bad kane ka bynta.

Lah ban kdew ba ha ka 29 tarik u Nailur ba la dep, ka sorkar jylla ka la pyntip sha ka iingbishar High Court ba ka la mynjur na ka bynta ban kham pynheh ia ka jingai ia ka lyngkhot jaka ka na ka bynta ban shna iing kumba la kyrpad na ki longiing napoh Them Metor.