Yn khmih bniah u Mukul Sangma iaka legal notice dawa bai mynrain khmat T.20 klur kaba la phah da u Henry halor ka jingshah kynnoh drug kingpin
U nongialam liang pyrshah naka AITC uba dei ruh u Myntri Rangbah barim ka jylla u Dr Mukul Sangma haka sngi Thohdieng u la ong ba un bishar bniah halor kino ki kyndon aiñ la ai jingujor ne legal notice pyrshah ia u da u Henry Lalremsanga, uba dei u Chairman jong ka 2B’s Group of Companies.
Haba kren sha ki lad pathai khubor, u Mukul u la ong ba um pat shym la ioh pdiang satia ia katei ka legal notice na u Henry.
“Kumta Ngan ap. Ngan peit kaba kum kano kata ka legal notice bad halor kiei ki kyndon jong ka aiñ ia kaba u Henry un phah sha nga ia kane ka notice. Ki don ruh katto katne ki sienjam kiba ka kynhun iasaid ne legal team jong ki, ki tip, kumta ngi long kiba la khreh lada ka la wan,” u la ong.
Halor ka jingkylli, u Dr Mukul u la ong, “Dei na kata ka daw Nga la ong halor kino ki kyndon ain kaba la pynlong ia u Henry ba un phah ia kane ka legal notice pyrshah ia nga.”
Ka legal notice ba la phah da ka K Kharmawphlang kaba dei ka nongiasaid aiñ jong u Henry Lalremsanga, ka dawa na u Mukul ba u dei ban pan map khlem da buh kyndon hapoh ka hynniew sngi namar ka jingkynnoh khlem nongrim pyrshah ia u Lalremsanga kum u snar khaii drok ne ‘drug kingpin’. La dawa ban siew ia ka bai mynrain khmat kaba T.20 klur hapoh ka hynniew sngi naduh ba la ioh pdiang ia kane ka notice lym kumta un mudui da ka mukotduma kam bymman (Criminal) bad Civil suit pyrshah ia u ha Iingkashari.
La dawa ruh ban sangeh mardor ban kren ne pynmih shuh shuh ia kino kino ki jingkren kynthoh ki bym shisha pyrshah ia u Lalremsanga bad ban long tyngkan ha u tylliej haba kren katkum bala kdew da ka ïingbishar ba ha khliehduh ka ri.
Kane ka notice ka long ban pynphai halor ka jingkren jong u Mukul Sangma hapoh ka iingdorbar thawain ha ka 19 tarik bad 20 tarik mynta u bnai.
La ong ba u Mukul ula kynthoh bad pynjahburom, ka bym don ka jingshisha, kala wanrah ia ka jingsngewdiaw kaba jur ia u Lalremsanga, ia ka ïing ka sem jong u bad ia ki kam ba u leh shabar ka Ri. Kane kala ktah ruh ia ka Jaidbynriew Mizo hakhmat ka pyrthei.
Ka notice ka ong ruh ba ia u Henry Lalremsanga la kem bakla ha u snem 2013 haba iadei bad ka jingiohkurup ia ki dawai ba shalan watla u don ia ka Licence kiba biang. Ka ïingkashari Special Court NDPS Act, Patiala House Court, New Delhi, ha ka 2018 kala pynkut ia kane ka mukotduma da kaba ong ba duna palat ki sakhi ban pynshisha ia ka jingpynkhein ain.
Lah ban kdew ba u Dr Mukul Sangma haba iashim bynta ha ka motion halor ka jingshyrkhei jong u drok hapoh ka dorbar synrai ka Meghalaya Legislative Assembly, u la kynnoh ia u Myntri Rangbah ka jylla u Conrad K Sangma halor ka jingdon jingiadei kaba jan bad une u snar khaii drok, kata da kaba pyni ruh ia ki dur ha ka mobile phone jong u kaba pyni ia u Conrad, ka kurim jong u bad u Henry Lalremsanga hapoh kawei ka jingialang kaba kyrpang kaba la long hapoh Delhi. Ia kane ka jingkren jong u Mukul la weng noh da u Lamphang ka iingdorbar na ki mat iatai hapoh ka iingdorbar ha ka sngi kaba bud, kata ha ka 20 tarik mynta u bnai.
Na ka liang u Mukul Sangma u la kynthoh ia u CM ka jylla halor ka jingrah ia kane ka mat shabar ka iingdorbar bad ai jingmut ruh ba kane ka legal notice ha ka jingshisha dei ban phah sha u CM ka jylla.
“Ka jingkren jong Nga hapoh ka iingdorbar ka long kaba shai. Ka long khamtam ha kaba iadei bad ka jingai jingmut na ka bynta u CM ka jylla, dei tang u CM u ba la rah ia kane ka kam shabar jong ka iingdorbar. U la dei ban phah ia kane ka legal notice sha u CM ka jylla,” ong shuh shuh u Dr Mukul Sangma.
Facebook
Instagram
Youtube
Twitter
Leave a Reply