Yn khang khyrdep ia ki Bank ki bym ithuh ia ki dulir khyndew, ong u CEM KHADC

Syllad | The Rising MeghalayaSeptember 2, 2023

Ka Khasi Hills Autonomous District Council (KHADC) ha ka sngi Thohdieng ka la byrthen ban khang khyrdep shisyndon ia ki Bank bad kiwei pat ki jaka kynshew pisa lada kim lah ban ai jingithuh ia ki dulir khyndew kiba ka la ai katkum ka KHAD (Regulation and Administration of Land) Act, 2021.

Ia kane la pynpaw da u Chief Executive Member (CEM) ka KHADC u Bah Pynïaid Sing Syiem ha ka jingialang bad ki nongmihkhmat na ki Bank bapher bapher kynthup ia ki jaka kynshet pisa ba shimet kiba treikam hapoh u pud u sam jong ka Council.

Kane ka jingshim rai jong ka KHADC ka la wan long ruh hadien ba ka la pdiang ia kiba bun ki ujor na ki paidbah halor ka jingkyntait jong ki Bank bad kiwei pat ki tnat kynshew pisa ia ki aplikeshon shim ram pisa tang namar ba ki kyntait ban ithuh ia ki dulir khyndew ba la ai da ka Council katkum ba la pynkupbor da katei ka Aiñ, kata ia kaba la mynjur ruh da u Lat ka Jylla.

U Bah Pyniaid haba kren sha ki lad pathai khubor u la ong, ba la bthah ïa u Deputy Secretary in-charge Land ban pynmih noh mardor ia ka jingpyntip bad ban ai kopi ruh ia ka KHAD (Regulation and Administration of Land) Act, 2021 sha baroh ki Bank bad ki shlem kynshew pisa khnang ba kin bud ia ki jingbthah.

Na ka liang u CEM u la ong ruh ba ki la ia kren da kaba shai ha ka jingialang hadien ba la pynmih ia ka jingpynbna ne “Circular” shaphang ka Aiñ, kata lada kano kano ka Bank ka dang iai bteng ban kyntait ia ka jingaplai loan ban ym ithuh ia ki dulir khyndew ba la ai da ka Council, ka Counsil kan sa leh ia kaba donkam katkum ka Non-Tribal Regulation Act, bad ban khang khyrdep syndon ia kiba kum kita ki Bank.

Shuh shuh u la ong ruh ba u Land Recording Officer u dei uba la pynkupbor ban ai ia ka No Objection Certificte na ka bynta ka Mortgage and Land Valuation Certificate bad ia ka Non-encumbrance Certificate. Kumjuh kumba la pynkupbor da ka ain yn ym ailad satia ia ki Bank ba ki kyntait ïa ki jingaplai loan da ki nongshong shnong kiba dei ki trai ri trai muluk.

Na ka liang u CEM u la ong ruh ba kane ka Aiñ kan long ruh ka jingkyrkhu ia ki paidbah khamtam kito kiba kwah ban pynskhem ia ka jinglong trai halor ka khyndew ka shyiap ka jong ki.