Yn khang iaki iew ki hat lada ym kohnguh iaki adong shnong ong ka Dorbar Shnong Tympang Iawmusiang

Syllad | The Rising MeghalayaFebruary 19, 2022

Ka dorbar shnong Tympang Ïawmusiang, Jowai kala rai ban khang iaki iew ki hat lada ki nongshong iew bad ki paidbah kim kohnguh iaki adong adit shnong naka bynta ban wanrah iaka khuid ka suba ka shnong ka thaw.

U waheh shnong Tympang Iawmusiang u Ma Edystone Shylla haba kren bad ki nongthoh khubor ula ong ba ka iew Iawmusiang ka hap hapoh ka dorbar shnong Tympang Iawmusiang, hynrei ki paidbah kiba im jakpoh naka Iawmusiang ki klet iaka shnong ka thaw bad ki leh bymsalia ban pynneh iaka khuid ka suba, wat la ka shnong kala pyrshang har rukom ki jingpyrshang.

Ula ong “baroh ki nongshong iew ki dei ban shong jingdie ha ki jaka bala pynbeit iaki, khamtam ki nongdie jingdie ha surok phim dei shuh ban shong jingdie ha ki jaka iaid paidbah bad phim dei ban bret  klumar iaki ñiut.”

“Ngi la buh iaki signboard ban mana pyrshah ban bret ñiut iaki ñiut, pynban ym don ba burom ne kohnguh iaki adong shnong. Kumta lada ngi lap ba ki paidbah ki leh pyrshah bad lum thup ïaki niut hapoh u pud u ang ka shnong ngi lah ban shim iaka rai ban khang iaki iew,” ong u ma Edystone Shylla.

La sakhi ba ha kine ki shitaiew ba sahkut ki ñiut ki don ruh ki mrad mreng ba iap kiba la bret lang ha ki jaka kaba la wanrah iaka jingsma iwtung kaba lah ban ktah iaka koit ka khiah u briew.

Kumta ka dorbar shnong kala rai ban pyrkhing iaka rukom bret ñiut bad kala khot la wer ia baroh ban bud ryntih iaki adong shnong ban lait na kino kino ki jingeh, la ong u ma Edystone

Ula ithuh ba ka Jowai Municipal Board (JMB) kala dep ban pynkhuid bad kit ïaki ñiut kiba la lang thup mynta la kumba shi taïew hakhmat ka ophis u Deputy Commissioner, Jowai kumjuh ha lad Thomas Jones.

Ka Dorbar shnong Tympang Ïawmusiang ka kyntu ruh ïaki sengbhalang bapher bapher ha rilum Jaintia ba kin ïatreilang bad ka Dorbar shnong ha kino kino ki kam kiba ïatyngkhuh bad ka dorbar shnong kum ki dukan, ki ïew ki hat bad ki ïing ki sem kiba don hapoh u pud u sam jong ka khnang ban lait na kino kino ki jingbym ïasngewthuh jingmut haki arliang mamla.

Ula ong ba ka dorbar shnong kam banse ban pynmih ïa kane ka jingkyntu kynpham namar ba don katto katne ki sengbhalang kiba shim kabu bad pyndonkam bakla ïaka jinglong sengbhalang.

“Ngi kloi ban ïatreilang bad kano kano ka sengbhalang kaba trei na bynta ka bha ka miat jong ka shnong ka thaw bad ka imlang  sahlang bad lada don kino kino ki kam ne ki jingeh kiba hap hapoh u pud u sam jong ka dorbar shnong pyntip sha ka dorbar shnong ngin ai ka jingïatreilang”, la ong u Waheh shnong.