Yn ioh pdiang u Rangbah Gloucester Nongbet ia ka khusnam “Sangeet Natak Akademi Amrit Award”

Syllad | The Rising MeghalayaSeptember 16, 2023

U Rangbah Gloucester Nongbet uba dei u nongtem nongrwai tynrai ba pawkhmat ka jylla u la don ha ka thup jong ki 84 ngut ki riew pawkhmat ha ka kam rwai, ka put ka tem bad kiwei uba la shah jied na ka ri India ban ioh pdiang ia ka khusnam ‘Sangeet Natak Akademi Amrit Awards’ na u Vice President jong ka ri India u Jagdeep Dhankhar ha ka jingrakhe ia ka Azadi Ka Amrit Mahotsav mynta ka sngi Saitjain.

U Gloucester Nongbet un ioh pdiang ia kane ka khusnam halor ka jingnoh synniang ka jong u ha kaba iadei bad ka tem ka put bad ka rwai tynrai hapoh ka jylla Meghalaya.

Ia une u rangbah la kha ha ka 8 tarik u Naitung 1938 ha Shillong, bad u la don ia kane ka sap ka phong kaba kyrpang naduh ba u dang khynnah rit.U la shongthait na ka kam kum u IRS ophisar jong ka tnat Customs ka sorkar Meghalaya.

Une u rangbah u don ia ka jingsngewtynnad  ban rwai ia ki jingrwai tynrai, ban thaw  jingrwai bad uba tbit ban tem ia ka Duitara nalor ka bisli, Guitar bad Piano.Nalor kata u la thoh ruh haduh palat 100 tylli ki jingrwai kiba iadei bad ka mariang, jingieid ri bad kiwei kiwei.

Nalor kata u la don ruh ha ka ‘A’ grade Artist jong ka All India Radio bad Doordarshan bad ula iashim bynta ha kiba bun ki lympung ban pyni  sap ha ki rynsan kiba long hapoh ka jylla bad ha kylleng jong kane ka ri.Shuh shuh u la thoh ruh bun tylli ki jingiathuhkhana na ka bynta ki kam ialehkai  drama bad phlim, bad u la iashim bynta ruh ha ka phlim Khasi kaba la ai kyrteng Sha Ba Sep Ka Sngi nalor kiwei pat.