Yn iatreilang ka sorkar bad ka North East United FC ban kyntiew ia ka jingialehkai phutbol ha ka Jylla

Syllad | The Rising MeghalayaMarch 15, 2024

Ka Sorkar Jylla lyngba ka Tnat Sports & Youth Affairs ka la ia mynjur ban iatehlok bad ka Club ialehkai phutbol ba pawkhmat ka North East United Football Club (NEUFC) ba la longtrai da u khlur ka Bollywood u John Abraham na ka bynta ban kyntiew ia ka jingialehkai phutbol ha ka jylla.

Ia kane la pynbna ha ka jingpynlong ia ka ‘Talent Identification and Elite Pathway Programs 2024-25’ bad ka jingpynkup burom ia ki samla kiba wanrah ia ka nam ha ki jingialehkai sports bapher bapher na ka bynta ka jylla Meghalaya kaba la long ha ka 14 tarik mynta u bnai ha madan ialehkai jong ka SAI ha NEHU, Shillong.

Na ka liang ka Tnat Sports kan pynioh ruh ia ka jaka na ka bynta ka NEUFC ha  Mawkhanu, East Khasi Hills ban tei ia ka Residential Football Academy na ka bynta ki kam aijinghikai jong ka kynhun ialehkai ka NEUFC bad kumjuh na ka bynta ki rang ialehkai phutbol ka Jylla.

Ha kane ka jingialang la pyllait ruh ia ka prokram ba la tip kum ka ‘Talent Identification Program bad ka Elite Pathway Program (EPP), kiba hap hapoh ka STAR Program ha ryngkat ka jingiatreilang bad ka Meghalaya State Olympic Association (MSOA).

Haduh mynta ki la don haduh 14,500 ngut ki nongwan iashim bynta kiba la shah tynjuh ha kane ka ‘Talent Identification Program’ lyngba ka jingpyndonkam ia ki bor jingstad ban lapdien ia ki player ialehkai kiba don sap.Lyngba ka EPP ki la don haduh 200 ngut ki player kiba la pyndep ia ka training kaba shi snem kynthih.

Hapoh ka edition jong u snem 2024-2025, sa kumba 10,000 ngut ki nongiashim bynta kaba kynthup naduh kiba dang 6 snem rta yn tynjuh ne tes hapoh jong ka ‘Talent identification program,’ bad sa kumba 200 ngut kiwei pat kin leit sha ka EPP Camp kaba ar.

Nalor kata ha kane ka jingialang la sam ruh ia ka khusnam kaba da ka song pisa sha ki player kiba la wanrah medal ha ki kam ialehkai spots bapher bapher kiba don baroh 297 ngut kaba kynthup ia ki coach, kata kaba kot baroh sha ka T.68 lak.

Ha kane ka jingialang la ia don lang ruh u Myntri Rangbah ka Jylla u Conrad K Sangma, u Chief Secretary, Bah D.P. Wahlang (IAS), Director, Sports and Youth Affairs, ka Kong Isawanda Laloo (IAS). Ha ka jingkren ki la pynpaw halor ki lad ki kabu kiba ki samla ialehkai ka Jylla ki la ioh lad lyngba ki sienjam ba la shim da ka sorkar ban kyntiew ia ki kam ialehkai sports bad ruh ha kiwei kiwei pat ki bynta.

 Kiwei pat kiba la ia don lang ha kane ka sngi ki kynthup ruh ia u Bah John F. Kharshiing, working President, MSOA, u John Abraham bad kiwei kiwei.