Yn iasyllok ka Sorkar ban shimti ia ki Skul bad College deficit ha ka jylla: Rakkam

Syllad | The Rising MeghalayaJune 6, 2025

U Myntri ka tnad pule puthi, u Rakkam A Sangma ha ka 5 tarik Jylliew u la ong ba ka sorkar ka la pynkhreh ban pyniaid shakhmat ban pynlong ki jingiasyllok na ka bynta ban shimti noh da ka sorkar ia ki Skul deficit bad College (Provincialisation) kiba don ha kylleng ka Jylla.

“Ka sorkar kan sa pynmih ia ka Meghalaya Education Grant (MEG). Ngi dang pynkhreh ban iasyllok bad ki bor pyniaid  jong baroh ki skul deficit namar ka sorkar ka dang pynkhreh ban shimti ne ban pyniaid hi ia baroh,” ong u Rakkam haba kren sha ki lad pathai khubor.

Haba pynpaw ba ka jingthmu ka long ban pynbeit ryntih ia ka kam pule puthi, u Myntri u la ong “Ngi kwah ba kin don tang ha ki laitylli ki kyrdan jong ki nonghikai, kata lada bun eh, kata ki ‘Government’, ‘Non-Government’ bad ‘Private’”. Kumba long mynta u la ong ba ki don haduh 13 jait ki kyrdan ki nonghikai skul bad 4-5 jait jong ki nonghikai college.

Haba kubur ba ki jingeh kin don beit, u Rakkam u la ong, “Bun ki jaka pule kin ym pdiang bad kiba bun ruh ki jaka pule ki ban kmen ban kylla long ki jaka pule ka sorkar. Kumta, ngin sa pynlong ia kine ki jingialang iasyllok khnang ban tip la kine ki jaka pule deficit kin ai ne em ka jingmynjur ia kane ka jingtyrwa.”

Na ka liang une u Myntri un sa iakynduh ia ki nongmihkhmat haka 6 tarik Jylliew ha Shillong ba iakren halor kane ka jingtyrwa jong ka sorkar.

“Ka jingtyrwa kaba nyngkng ka long ba ka sorkar ka dang pynkhreh ban shimti noh ne ‘provincialised’ ia baroh ki jaka pule deficit, kata naduh ki college haduh ki skul primary namar ba ki la don lypa ki sanction post,” ong u Rakkam haba bynap, “Ka don ka jingeh namar ki bor pyniaid jong kne ki jaka pule ki lah ban ym pdiang, hynrei kito ki bym mynjur ka rukom bhah tyngka kan sa pher noh bad na ka bynta kito kiba kloi ban pdiang ka sorkar kan sa shim ia ka rai.” 

Haba kylli, u Myntri u la ong ba ka sorkar ka donkam ban pynlut sa T.30-40 klur na ka bynta ban provincialized ia baroh ki jaka pule kiba dei ki deficit. 

Katkum ka jong ong jong u, kane kan iarap shibun ban pynhiar ia ka dor bai pule kaba lashim da ki jaka pule diricit kumba ka long mynta. 

U la ai nuksa ruh da kaba ong, “Ha Shillong College, ki don 71 tylli ki sanction post jong ka sorkar. Ka jingshim bai pule kumba ka long mynta da kane ka college ka long T.60,000, hynrei lada ka college kan kylla noh kum ka college sorkar, ka jingshim bai pule kan long noh tang T.15,000.”  

U Myntri ula pyntip ruh ba ka sorkar kala pynlut haduh kumba T.2000 Klur tang ha kaba iadei bad ka tulop jong ki nonghikai ha ka shi snem. 

“Na kane, ngi pynlut haduh T.927 klur na ka bynta ka jingsiew ia ka tulop sha ki palat 17289 ngut ki nonghikai deficit bad adhoc, T.366 klur na ka bynta 14,666 ngut ki nonghikai SSA bad T.216 klur na ka bynta ki 1399 ngut ki nonghikai college bad kiwei kiwei,” u la ong.