Yn iasoi MoU ka DS Nongdewsaw bad ka JICA ban pynneh pynsah ia ki jaka khlaw

Syllad | The Rising MeghalayaMarch 17, 2024

Ka Executive Committee jong ka Dorbar Shnong Nongdewsaw, Ri Bhoi District lyngba u Rangbah Shnong Bah AB Warjri ka pyntip paidbah ba shen ka shnong kan sa ia soi ia ka Memorandum of Understanding (MoU) bad ka Japan International Cooperative Agency (JICA) ban aiti ia ki jaka khlaw ka ban kot haduh 20 hectare na bynta ban pynneh pynsah bad pynrben  ia ki khlaw ki btap da kaba thung ia ki tynrai dieng.

Ia kane u Bah Warjri u la pyntip hadien ba la dep pynlong ia ka jingjied Rangbah Shnong thymmai ha kaba na ka liang ki paidbah jong ka shnong Nongdewsaw ki la ibit biang ia u ba un shimti ia kane ka kam kum u khliehduh jong ka shnong.

Haba kren sha ki lad pathai khubor, u Bah Warjri  u la ïathuh ba ka Dorbar shnong ka la ïoh pdiang ïa ka skhim lyngba ka JICA na ka bynta ban pynneh pynsah bad ban thung dieng ha ki khlaw. U la ong ruh ba JICA ka la pan haduh kumba 20 hectare eiei ki jaka khlaw na ka bynta ban thung dieng na ka bynta ban pynneh pynsah ïa ka mei mariang.

Kumta na ka liang u Rangbah Shnong u khot u wer ia baroh ki nongshong shnong lem bad ïa kito ki bym dei ki trai shnong hynrei kiba don pat ïa ki jaka hapoh ka shnong Nongdewsaw ba kin wan mih ha ka  23 tarik Lber, 2024 ha ka por 9 baje mynstep ban ïakynduh bad ki nongpynïaid shnong ha ka ophis treikam na ka bynta ban ioh iakren ia pynbeit halor kane ka bynta.