Yn iamir jingmut ka sorkar jylla halor ka jingkylli ba la buh da ka MHA ha kaba iadei bad ka MRSSAB: Dy CM

Syllad | The Rising MeghalayaNovember 4, 2023

U Symbud Myntri Rangbah ka jylla u Bah Prestone Tynsong haka sngi Thohdieng u la pyntip ba ka Sorkar Jylla kan pynlong ka jingiakynduh ha ka taiew ka ban wan ban iamir jingmut halor ka jingkylli ba la phah da ka Ministry of Home Affairs (MHA) ha kaba iadei bad ka Meghalaya Residents, Safety and Security (Amendment) Bill, 2020.

Haba kren sha ki lad pathai khubor, u Bah Tynsong u la ong ba ka MHA ka la pynphai biang ha kaba iadei bad ka MRSSAB khlem da ai satia ia ka jingmynjur.

“Namar ka jingbym ioh ia ka jingmynjur ha kaba iadei bad ka jingpyntreikam ia ka MRSSAB da ka Ministry, kumta kane ka la wanphai biang sha ngi. Na ka liang u Myntri Rangbah ka jylla u la dep lypa ban khot ia ka jingialang bad ki riew shemphang ha ki kam ain kumjuh bad ki heh sorkar ha kane ka taiew ka ban wan. Ngin shong bad shim ia ka rai kumno ban pyniaid shakhmat ia kane ka kam,” ong u Symbud Myntri Rangbah.  

Ha ka 30 tarik u Risaw ba la dep, ka sorkar jylla ka la hukum ia ki trai iing, ki nongshongwai na ki hynniew tylli ki shnong kiba don ha ka nongbah Shillong ba kin register ialade lyngba ka app kum ka mat kaba dei ban leh katkum ki kyndon jong ka Meghalaya Residents Safety and Security Act (MRSSA) 2016 khnang ban lah ban tehlakam ia ka jingwan rung beain jong ki briew kiba na bar sha kane ka jylla.

“Hynrei, ngim shym la pynpaw ba ka jingpyntreikam ia kane ka Act ka la urlong naduh kine ki khyndiat sngi ba la dep namar ngi la dep ban thaw ia ki kynhun hapoh ki district ba la khlieh da ki Deputy Commissioner bad wat ki SP kum ki dkhot jong ka committee,” ong u Bah Tynsong.

Shuh shuh u la ong ba kine ki committee ki la long kiba la pynkhreh bad ba ki la dep ruh ban hukum ia baroh ki Deputy Commissioner ba kin pyntreikam ia kine ki kyndon jong ka MRSSA bad ban pynthikna ban pyntreikam pura hapoh la ki jong ki jaka kiba ki dei khmih.

Ki tyllong khubor ki iathuh ba kane ka jingbuh jingkylli jong ka MHA ka dei eh khamtam halor ka jingiadei bad ki kyndon ain kiba iadei katkum ki riti synshar khadar jong ka ri.