Yn iakynduh u CM ia u Ambassador ka US ba kynthoh bym shngain ia ki tourist ha Meghalaya

Syllad | The Rising MeghalayaJune 25, 2025

U Myntri Rangbah ka Jylla, u Conrad K Sangma u pyntip ba shen un sa leit iakynduh da lade hi ia u Ambassador ka US ban iakren halor ka jingbthah ba la pynmih da ka Sorkar United States kaba shim ia ka Meghalaya kum ka jaka ka bym don jingshngain na ka bynta ki nongwan shangkai pyrthei.

Haba kren sha ki lad pathai khubor haka sngi Ar, u Conrad u la ong ba un sa leit iakynduh ia u Ambassador ka US lyngba ka Ministry of External Affairs bad Ministry of Home Affairs ban pyntip sha ki ba katei ka jingpynbna ba la pynmih ka long kaba bakla shibun bad ban kyrpad ia ki ba ki dei ban pynkylla noh mardor.

“Nga kyrmen ba kin sngewhun ia kata ka jingbatai bad da ka jingkyrshan bad ka jingiatreilang bad ka MEA, ngi dei ban lah ban pynbeit ia kane ka jingpynbna kaba bakla kaba la dep ban pynmih,” u la ong.

U Conrad u la pynskhem ba ka jylla Meghalaya ka dei ka jaka kaba shngain pura bad ia kaba la pynshisha ruh khlem kano kano ka jingartatien.

Ka Sorkar US ha kine ki khyndiat sngi ba la dep ka la pynmih ia ka jingbthah kaba aijingmut ia ki nongshong shnong jong ka ba kin pyrkhat arsien ban leit sha Meghalaya bad kiwei pat ki jylla ka thain Shatei Lammihngi ka ri India namar ki kam lehnoh bad ki kam thombor.

U Myntri Rangbah u la pynpaw ruh ka jingsngewsih ba haduh mynta ki lad pathai khubor ki dang buh jingkylli halor ka jingshngain ka jylla Meghalaya da kaba ong, “Hato phi artatien ba ka Meghalaya ka dei kaba shngain ba phi la kylli ia nga ia kane ka jingkylli. Katto ka la biang.” “Ka Meghalaya ka dei ka jaka kaba shngain bad ia kane la pynshisha khlem ka jingartatien,” u la bynrap.

Nalor kata u la kyntu ruh ia ki lad pathai khubor ban shim ia ka jingkitkhlieh bad ia ka bynta kaba kongsan na ka bynta ban tei bad iasaid pyrshah ia kiba pyrshang ban pynjah burom ia ka jylla bad ia ki nongshong shnong jong ka.