Yn iakynduh ka Shillong Lajong bad ka Rangdajied ha ka quarterfinal ka Meghalaya State League

Syllad | The Rising MeghalayaJanuary 7, 2025

Ka lahduh jong ka samoi ba la dep ka Rangdajied United bad ka lahduh jong u snem 2019, ka Shillong Lajong kin iakhun pyrshah ha ka quarterfinal jong ka lympung Meghalaya State League 2024, ka ban long ha ka 9 tarik Kyllalyngkot ha Wahiajer Sports Complex ha ka por 1 baje nohphai sngi.

Ia kane ka lympung ialehkai ba la pyniaid a ka Meghalaya Football Association bad ba la kyrshan da ka sorkar Jylla la pynsangeh shwa ha u bnai Naiwieng ba la dep ban ailad ia ki player ka jylla ba kin leit iashim bynta ha ka National Football Championship jong ka Santosh Trophy ha kaba ka Meghalaya ka la shah rem noh ha ka quarterfinal.

Na ka liang u Director ka Tournament ka MSL 2024, u Dr LL Mawsor u la pyntip ba ki la don phra tylli ki club kiba la rung sha ka quarterfinal.

Hadien ka jingialehkai kaba nyngkong, ka quarterfinal ha ha ka 11 tarik Kyllalyngkot kan long hapdeng ka Sutnga (East Jaintia HIlls) pyrshah ia ka Ladthadlaboh (West Jaintia Hills) ha Diengshynrum, Khliehriat. Katba ha Shillong ha Madan SSA Stadium, ka Mawlai kan iakhun pyrshah ia ka Khliehmawlieh, kata hadien ba ki la dep iakhun ha ka semifinal jong ka MSL 2023.

Katba ha ka quarterfinal kaba saw yn sakhi ia ka jingiakhun hapdeng ka Chipakkore pyrshah ia ka Rymbai Shkenshynriah ha madan PA Sangma Stadium ha Tura ha ka 14 tarik Kyllalyngkot.

Ka Chipakkore (Group A), Sutnga (Group B), Ladthadlaboh (Group C), Rangdajied (Group D), Lajong (Group E) bad ka Mawlai (Group F) ki dei kiba wan ha ki kyrdan kiba hakhliehduh ha la ki jong ki kynhun.

Ka Lajong ka la pynrem ia ka Rangdajied ha ka jingialehkai final jong u snem 2019 bad ban rah ia ka nam lahduh ha Khliehriat, hynrei ka Rangdajied ka la ioh ruh ia ka lad ban pynliem noh ia ka Shillong Lajong ha ka semifinal jong u snem 2023 shwa ban rah syndon ia ka nam lahduh.