Yn iaknieh rung final ka Amlarem, Seinbhalang, Jarain bad ka Pdengkarong haka Super League ka ASSA

Syllad | The Rising MeghalayaDecember 23, 2024

Ka Amlarem SCC, Seinbhalang Shkentalang, Jarain SCC bad YC Pdengkarong kin iakhun ban iaknieh rung sha ka final jong ka Super League kaba pyniaid da ka Amlarem Sub Divisional Sports Association (ASSA).

Ka Amlarem kaba wan haka kyrdan kaba hakhlieh duh haka miej iakhein point da kaba ioh khur 13 poin na ki 7 sien bud ka Seinbhalang Shkhentalang kaba wan ba ar hadien ba ka kamai 11 poin kin iakhun iaka qualifier 1, katba ka Jarain bad ka YC Pdengkarong mar 9 poin kin iakhun iaka eliminator round.

Kiba jop na ka eliminator kin iakynduh iaka rem naka qualifier 1 ban iaknieh rung sha ka final.

Ka Umladkhur SC bad Pamtbuh namar ka jingbym lah ban ialehkai bha mynta ka aiom ialehkai kila hap ban hiar kyrdan sha ka First Division ha ka aiom ialehkai ka ban wan.

Haba phai sha ka jingialehkai kaba khatduh kaba long haka 23 tarik Nohprah, ka jingialehkai kala kut da ka jingiakhaid da mar 1-1 hapdeng ka Umladkhur pyrshah iaka Jarain C&SC.

Iaka kol jong ka Jarain la thep da u Ravi Manner (43) katba iaka kol jong ka Umladkhur la thep da u Baieidthoid Shylla (45).

Ha kawei pat ka jingialehkai, ka Dongmihsngi Mupyut kala jop da 1-0 pyrshah iaka Seinbhalang Skhentalang. Ia kane ka kol jong ka Dongmihsngi Mupyut la thep da u Dahunmi Khyriem (45).

Haka jingialehkai kaba khatduh jong ka wat kaba nyngkong, ka YC Pdengkarong kala jop da 1-0 pyrshah iaka Pamtbuh SC. Ia kane ka kol jong ka YC Pdengkarong la thep da u Special Nongrum (65).