Yn iakhun biang ki 7085 ngut ki khynnah ia ka eksamin SSLC Supplementary ha ka Jylla

Syllad | The Rising MeghalayaApril 30, 2025

Ki la don haduh 7085 ngut na ki 8918 ngut ki khynnah pule (79.44%) ki ba la register ialade ban iakhun ia ka Secondary School Leaving Certificate (SSLC) Supplementary Examination 2025, ka ban long naduh ka 1 -8 tarik u Jymmang 2025.

Ia kane ka eksamin yn pynlong ha ki 76 tylli ki centre ha kylleng ka jylla, kata kaba kynthup ia 49 tylli ki centre hapoh Rilum Khasi bad Jaintia bad 27 tylli ka Rilum Garo.

Ki khynnah pule kiba la register na na Rilum Khasi ki long 2235 bad 4850 na Ri Lum Garo.

“Ka Meghalaya Board of School Education ka khmih lynti ban pyndep ia kane ka kam baroh hapoh jong u bnai Jymmang hi khnang ban plie lad ia ki khynnah kiba pass ba kin ioh bteng ia ki jingpule jong ki ha ki Higher Secondary School ha kylleng ka jylla,” pyntip u Commissioner & Secretary ka Tnad ka pule puthi u Vijay Kumar Mantri ha ka kyrwoh khubor ha ka 30 tarik Iaiong.

Na ka liang ka tnad pule puthi ka kitbok kitrwiang ia baroh ki khynnah pule ki ban iakhun ia kane ka SSLC Supplementary Examination, 2025.