Yn ia aireng ka AITC ha ka election Lok Sabha na baroh ki artylli ki seat ha Meghalaya

Syllad | The Rising MeghalayaAugust 30, 2023

U State president ka AITC u Bah Charles Pyngrope mynta ka sngi Balang u la pyntip ba ka party ka la shim ia ka rai ban ia aireng na baroh ki artylli ki seat napoh Shillong bad Tura ha ka election Lok Sabha ka ban long ha u snem u ban wan.

Haba kren sha ki lad pathai khubor, u Bah Pyngrope u la ong ba un dang pynlong ka jingiakren halor kane ka bynta bad ki nongialam ba halor jong ka party. “Ha ka jingshisha Nga la iakren bad u general secretary in-charge u Manas Ranjan Bhunia mynta ka step ban kyntu ia u na ka bynta ka jingialang, bad lehse u lah ban wan lane Ngan hap ban leit sha Kolkata ban shim ia ka rai kaba khatduh ha kaba iadei bad kane ka bynta,” ong u Bah Pyngrope.

Nalor kata u la ong ruh ba ka party kan hap ban ai ka jingmynjur ha kaba iadei bad ki katto katne ki mat hashwa ban pyniaid shakhmat namar ka party ka la dep don lypa ia ki kyrtong na ka bynta kane ka ilekshon ka ban wan.

Halor ka jingkylli, une u president ka jylla u la ong, “Na ka bynta ka Shillong region, ka shong ha ka jingsngew ka jong nga shimet, hynrei kan shong pat ha ka jingshim rai jong ka party hi baroh kawei, Nga sngew ba u Bah George Lyngdoh un dei u kyrtong uba biang tam. Katba napoh Garo Hills, Nga ieh ha ka jingstad jong u nongialam ka parliamentary party u Dr Mukul Sangma ba un shim ia ka rai kaba khatduh.”