Yn bteng ka jingsangeh kit dewbilat, hap iakren pynbeit ka JAC bad ki Kharkhana

Syllad | The Rising MeghalayaJune 18, 2020

Ka jingialang kaba la khot da u Deputy Commissioner, East Jaintia Hills District, Bah FM Dopth iaki nongialam ka JAC bad ka JHCMA kala kut khlem kino kino ki soh ki sla bad la ai por iaki shitaiew ban pynbeit ïaka dor kit thymmai ïaka cement bad ka clinker bad kiwei ki mar haka sngi Palei.

“U Deputy Commissioner, East Jaiñtia Hills Bah Dopth ula ai por shitaiew ba ngin ia pynbeit ia kane ka dor ka mur thymmai ban kit dewbilat bad clinker,” la ong Nidamon Chulet president JHTOA.

Ula ruh ba hadien bala pynbna ka sorkar ïaka dor kit mar thymmai, ka JAC kala iakhih khlem buh por ban pynbor iaki kharkhana ban pyntreikam ïaka dor thymmai, hynrei ki kharkhana dewbilat kim lah satia ban pyntreikam ia kane ka dor thymmai. Ula iathuh ba ka JAC kala iakynduh ia u Myntri Transport ka Jylla uba la bthah ia u DC ban khot jingialang hapdeng ka Synjuk ki nongpynmih cement (JHCMA) bad ka JAC kaba iatreilang ka AJCCTA, MTU.

“Ngi artatein ba kane ka dor thymmai kan treikam namar ba bunsien ngi la khot ïaka JHCMA ban wan shaka jingialang ban pynbeit ia kane ka kam, hynrei kim patiaw satia ban wan shaka jingialang,” ong u Nidamon.

U president ka JHCMA u RK Pareek, ula ong ka jingialang ka long kaba seisoh bad kin sa shong jingialang bad ka JAC ha kine ki khyndiat sngi ban wan.

Ka Joint Action Committee kaba iatreilang ka Jaintia Hills Truck Owners and Driver Association (JHTOA) ka All Jaintia Cement and Clinker Transports Association (AJCCTA) bad ka Meghalya Trucker Union (MTU) kila rai ban bteng iaka jingiakhih sangeh kit mar tad haduh bala pynbeit ïaka dor ba thymmai ki trok.

U Nidamon u khot wer ia baroh ki trok ban sangeh shuwa ban kit ia baroh ki jait mar na ki kharkhana dewbilat haduh ban da urlong ka jingdawa ka jong ki.