Yn bishar ka iingkashari HC ia ka jinglong jingman ha ka skulbah NEHU ha ka 6 tarik  Nohprah

Syllad | The Rising MeghalayaNovember 23, 2024

Ka iingkashari Meghalaya High Court ha ka 22 tarik Naiwieng ka la rai ban shong bishar ia ka jinglong jingman ha ka skulbah North Eastern Hill University (NEHU) ha ka 6 tarik u Nohprah, kata hadien ba ka Inquiry Committee kaba pynlong ka jingtohkit halor ki jingkynnoh pyrshah ia u Vice Chancellor u Prof PS Shukla ka la aiti ia ka kaiphod bad ki jingai jingmut.

Ha ka hukum ba la pynmih hadien ka jingbishar ia ka PIL, ka kynhun ki nongbishar kaba kynthup ia u Chief Justice IP Mukherji bad u Justice B Bhattacharjee ka la ong, “Ngi tharai ba ha kane ka khep, kan bha ia ka iingkashari ba kan ap ia ka kaiphod jong ka Committee, ki jingai jingmut jong kad bad kano kano ka lynti ban pynbeit lada don ba aijingmut da ka Committee bad pyntreikam da ka University. Ngin pynsangeh ia kane ka kam haduh ka 6 tarik Nohprah, 2024 ban bishar bniah ia ka jinglong jingman.”

Ka iingkashari ka la pynpaw ruh da ka jingsngewhun halor ka jingpynsangeh noh jong ki samla pule ka NEHU ia ka jingshah thngan hadien ka jingpynmih ia ka hukum ha ka 20 tarik Naiwieng.

Ka hukum ka ong  “Kumba la kdew ha ka jingpynmih hukum jong ngi ha ka 20 tarik Naiwieng, ia ka hukum kaba 14 tarik Naiwieng la pynmih da ka Ministry of Education, New Delhi kaba la thung ia ka Inquiry Committee halor ki jingkynnoh pyrshah ia u Vice Chancellor bad kiwei pat halor ka jingbym lah treikam bad pyniaid beit ia ki kam ki jam jong ka University bad ai por ruh hapoh 15 sngi ia ka Committee ba kan aiti ia ka kaiphod ha ryngkat ki jingai jingmut ban pynbeit ia kane ka kam. Kane ka jingai por kan kut ha ka 29 tarik Naiwieng, 2024.”