Ym pat kyrkieh ka UDP ban pynbna ia ki kyrtong na ka bynta ka ilekshon MP bad MDC ban wan Metbah

Syllad | The Rising MeghalayaOctober 19, 2023

U President ka Seng United Democratic Party (UDP), u Bah Metbah Lyngdoh haka 18 tarik Risaw, u la ong ba ka party kam pat kyrkieh ban rai ia ki kyrtong na ka bynta ka ilekshon Lok Sabha na Shillong Seat kumjuh ka MDC ka ban sa long ha une u snem u ban wan.

Haba kren sha ki lad pathai khubor, u Bah Lyngdoh u la ong; “Kum u president ka party, Nga sngewkmen ban tip ba ki don katto katne ngut kiba kwah ban iakhun ha kane ka ilekshon MP kumjuh ka ilekshon MDC ka ban wan na ka party UDP, hynrei na ka liang ka party kam pat kyrkieh satia ban shim ban pynbna ia ki kyrtong.”

Kumba ka long mynta u president ka party u la ong ba ki la don ar ne laingut kiba la pan tiket na ka party ban iakhun ha kane ka ilekshon Lok Sabha ka ban wan na Shillong Seat. “Hynrei, ngim pat shim satia ia kano kano ka rai kaba khatduh ha kaba iadei bad kane ka bynta.Ia ka rai yn sa shim hadien ba ka party kan shong pynlong ia ka jingialang,” ong u Bah Metbah.

Ki tyllong khubor na ka party ki la pynpaw ha ka sngi ba Ar ba la lah ba ki kyrteng jong ki arngut ki nongmihkhmat barim, kata u Bah Jemino Mawthoh na Nongthymmai bad u Bah PT Sawkmie na Mawlai nalor u president ba la shongthait ka Seng Hynniewtrep Youths’ Council (HYC) u Bah Robertjune Kharjahrin kiba la pan tiket na kane ka party.

Ha kaba iadei pat bad ka ilekshon MDC ka ban long ha une u snem 2024 u ban wan, u president ka party u la ong ba ka Seng UDP kam pat iakren ne shim ia kano kano ka rai halor kane ka phang, hynrei u la pyntip ruh ba ki la don ki MDC kiba pynpaw ba ki kwah ban iakhun ia kane ka elekshon na ka ticket ka party kynthup ruh ki MDC ba mynta kiba dei na ka party UDP.