Ym pat don khlam Covid-19 ha Jylla; la pynkhreh ia ki lad jingiada

Syllad | The Rising MeghalayaMay 27, 2025

U Principal Secretary & Development Commissioner ka Tnad Health & Family Welfare u Sampath Kumar haka sngi Nyngkong u la khot pynlong ia ka jingialang bishar kam bad ka Medical Expert Committee (MEC) ban bishar bniah halor ka jingpynkhreh ka jylla na ka jingwan lyngshop jong ka khlam Covid-19 hadien ba la sakhi ia ka jingshah ktah jong ki briew ha ka ri.

Ka la don ka jingpynshai bad ka jingbatai lyngba ka State surveillance officer, Integrated Disease Surveillance Programme (IDSP) ka jylla halor ka jinglong jingman jong ka khlam Covid-19 ha Meghalaya naduh u snem 2020 haduh u bnai Jymmang 2025, ka jingai injek Covid haduh mynta bad halor ki jingpynkhreh ia ki lad jingsumar ha ka jylla.

Ka jingialang ka la banjur halor ka jingdonkam ban pynkhlain ia ki lad peitngor lyngba ka jingdonkam ban pynjur ia ka jingleh ia ki test bad kiwei kiwei ki jingpynkhreh.

La bthah ruh ia baroh ki jaka sumar sorkar bad shimet ba kin peit bniah bad pynkhlain lypa ia ki lad jingiada na ka khlam Covid-19 kaba kynthup halor ka jingpynkhreh lypa ia ki oxygen, ki jingtei kiba kongsan, ki kyndon ban khmih bad sumar ia kiba shah ktah ha ka jingpang Severe Acute Respiratory Infection (SARI), Influenza-like-Illness (ILI) bad ki jingpang shit met.

Nalor kata la bthah ruh ban shim biang ia ki jingkhein jingdiah halor ka jingdon ki dawai ba kongsan bad ban pynthikna ia ki jingtreikam jong ki jaka test ha baroh ki District.

Na ka liang u Principal Secretary u la kyntu ban shim ia ki sienjam halor ki lad jingiada da kaba ban jur halor ka jingdonkam ban peitngor ia kiba pang ILI/SARI/ Shit met khamtam ha ki jaka ba bun briew kum ha ki iew ki hat, ki ophis bad ki jaka pule puthi.

La bthah ruh ia ki jaka sumar ba kin bishar ia ki rukom treikam bad pynthymmai ia ki Standard Operating Procedure (SoP) bad ban khmih bniah biang ia ki kyndon kiba la pyntreikam na ka jingwan lyngshop jong ka khlad Covid-19 ha ki snem kiba la dep.

Na ka liang ka Tnad ka pynthikna ruh halor ki sienjam ban pynneh ia ka jingpeitngor, ban kiar na ka jingkhihwin jong ki briew bad ban iatreilang ryngkat ryngkat bad ki riew shemphang bad ki jaka sumar ban pynthikna ia ka jingshngain jong ki nongshong shnong.