Ym kwah kyrtong monlang ka NPP haka elekshon MP Lok Sabha na Shillong

Syllad | The Rising MeghalayaSeptember 2, 2023

Ka party synshar ka National People’s Party (NPP) ka la shim ia ka rai ban pynieng kyrtong na baroh ki artylli ki seat, kata napoh Shillong bad Tura na ka bynta ka ilekshon Lok Sabha ka ban long ha une u snem u ban wan, hynrei kan dang shim rai ha kaba iadei bad ki kyrtong ki ban ia aireng.

Haba pynbna ia kane mynta ka sngi Thohdieng, u MP ka Rajya Sabha uba dei ruh u president ka seng NPP ka jylla u Dr. WR Kharlukhi u la ong ba ka party jong u ha kane ka kynti kaba mynta kam kyrshan iaka jingpynieng kyrtong monlang na ka bynta ka Shillong parliamentary seat.

“Ngin pynieng kyrtong na baroh ki artylli ki seat, ba ngi kyrmen ba ngin ioh ia ka jingjop ha kane ka ilekshon,” ong u Bah Kharlukhi sha ki lad pathai khubor.

Mynta ia ka Tura parliamentary seat la mihkhmat da ka MP ka NPP ka Agatha A Sangma katba napoh Shillong da u nongialam ka seng Congress u Ma Vincent H Pala.

Watla katta na ka liang u Bah Kharlukhi u la ong ba na ka liang ka party kan dang shim rai ha kaba iadei bad u kyrtong na ka bynta ka Shillong parliamentary seat.

Halor ka jingkylli la u nongialam ka BJP u Bah HM Shangpliang un wan ban pyniasoh noh sha ka NPP na ka bynta ban iakhun ia ka elekshon Lok Sabha, na ka liang u Dr Kharlukhi ula ong ba haduh mynta hi kam pat don satia kano kano ka jingpynthikna hynrei u dang shu sakhi tang lyngba ki lad pathai khubor.

Shuh shuh u la ong ruh ba kumba la sakhi na ka elekshon MLA ba dang shu dep, ka NPP kam shym lah ban jop na bun tylli ki constituency ha Ri-lum Khasi bad Jaintia ym kum ka Ri-lum Garo. Hynrei u la ong pat ba ka NPP ka la ioh bun eh ha ka jingioh vote haba shim kyllum ha kane ka ilekshon kaba dang shu dep shen.