Ym don pisa ka PWD ban maramot iaka surok bah NH 6 bad NH 40 E

Syllad | The Rising MeghalayaOctober 1, 2021

Ka Jaintia Students’ Union (JSU) kala ong ba ka PWD Jowai Central Division kam don pisa ban maramot iaka surok bah NH 6 bad NH 40 E kiba sniew tasam bad dap satang ki thliew ki syar.

Kine ki artylli ki surok ym i kop shuh ban ong ba ki dei ki surok bah namar ba kiba bun ki bynta surok kila jot rathai, watla ki dei ki surok kiba wanrah ne kyntiew iaka Ioh ka kot.

Ia kane ka JSU kala ong hadien ka jingwan iakynduh ia u Executive Engineer, Jowai Central Division haka 30 tarik u Nailur hadien ka jingud jingnam ki paidbah naka jingsniew tasam kine ki artylli ki surok bah.

Ka JSU kala ong ba une u Engineer ula kam bad ka sorkar pdeng kam ai bhah pisa shuh ban maramot ia kine ki surok lait tang ka jingmramot barit ria.

U Executive Engineer ula pynsngew sha ka JSU ba ka NHIDCL shen kan khot tender na ka bynta ban maramot ïa katei ka surok, la ong u general secretary ka JSU Shillong Circle u Request Pakma, u president ka JSU War Jaintia u Eddy Kerry Pohtam.

Ka JSU ka kyrpad ïaka sorkar Jylla kumjuh ka sorkar kmie ban maramot mardor ïaka surok bah NH 6 bad NH 40 E khnang ban suk ka ïaid ka ïeng paidbah.

Ka JSU kala buh jingkylli ruh ia ki MLA Rilum Jaiñtia ba hato kim iohi iaka jingsniew kine ki surok ne ki her da liengsuin ban leit ban wan na Shillong Jowai.