Ym don bynta ka tnad Tourism haka tamasa hajan civil hospital Ialong

Syllad | The Rising MeghalayaMay 18, 2025

Ka Tnad Tourism ka Sorkar Jylla ka pynshai ba kam don bynta ei ei ruh ha kaba iadei bad ka tamasa ka tem ka put ba thmu ban pynlong hajan civil hospital, Ialong ha West Jaintia Hills.

Ka District Tourism Officer, ka Kong S Shylla lyngba u kyrwoh ka la ong ba na ka liang ka tnad kam don jingtip ei ei ha kaba iadei bad kane ka tamasa bad kam ia don bynta ei ei ruh ha kane ka prokram.

“Ia ka kyrteng bad ka shap lem bad kiwei ki jingdon jingem jong ka tnad ym dei ban pyndonkam bakla,” ong u kyrwoh da kaba maham ban leh da kaba tyngeh pyrshah ia kino kino kiba pyndonkam khlem jingbit.

Kane ka la wan long ruh hadien ba ka seng Jaintia Students’ Union (JSU) ka la pynpaw ka jingpyrshah kaba jur halor ka jingthmu ban pynlong ia kane ka tamasa hajan katei ka hospital, kata da kaba kdew halor ka jingpynsawa bad ka jingshngain jong ki paidbah hajan kane ka hospital sorkar kaba bun briew.

Na ka liang ka JSU ka kyntu ruh ia ki bor sorkar ba dei khmih ba kin tuklar mardor bad ban pynkynriah noh ia kane ka tamasa sha kiwei pat ki jaka kiba kham biang khnang ban pynthikna na ka bynta ka jingshngain jong ki nongpang, kiba donkam ia ki jingsumar ba kyrkieh kumjuh ia ki paidbah bad ban bud ryntih ia ki kyndon ain.