Ym dei ban leh kyrkieh ban plie iaka khaii pateng hapdeng ka India Bangladesh ong ki sengbhalang

Syllad | The Rising MeghalayaJune 16, 2020

Ka jingpyrshah ki sengbhalang bad ki shnong ha War Jaintia la hap ban pynsangeh shuwa ne buhteng ban plie ïaka khaii pateng hadpeng ka India bad Bangladesh lyngba ka kad khaii Dawki LCS.

U Deputy Commissioner, West Jaintia Hills Ma Garod LSN Dykes hadien ka jingpyrshah jong ki sengbhalang ba kynthup ia ka JSU War Jaintia Circle, HNYF Southern Riwar Circle, HYC War Jaintia Circle, KSU War Jaintia Circle, ka shnong Nongtalang bad Bakur ban plie iaka iew hadpeng ka India Bangladesh lyngba ka Dawki LCS, ula khot jingialang haka 15 tarik une u bnai.

Ha kane ka jingialang nalor u DC la iadonlang ka Additional Deputy Commissioner incharge Amlarem Civil Sub Division Kong JU Kharpuri, SP West Jaintia Hills, SDPO Amlarem bad kiwei kiwei.

Baroh kiba wan ha katei ka jingialang kila pynpaw ka jingpyrshah ïaka jingthmu jong ka sorkar ban plie iaka kad khaii lyngba ka Tamabil namar ka jingsyier ïaka khlam COVID-19. Ka jingpyrshah ban plie ia ka khaii pateng hapdeng kine ki ar ri kalong ba ki sengbahlang bad ki shnong kim don ka jingsngew shngain haka tnad ka koit ka khiah ba kan lah ban ai ka jingshakri namar baka War Jaintia ka duna bad sahdien haka liang ka koit ka khiah.

Ki nongialam shnong bad ki sengbhalang kila dawa ba ym dei ban kyrkieh ban plie iaka khaii pateng hapdeng ka India bad Bangladesh bad ka sorkar ka dei ba pynthikna ba kan lah ban pyrkhing bad ban ai ka jingiada iaki nongkhaii bad nongshong shnong naka jingpur ka khlam naka jingkhaii pateng hadien ba uwei u nongkhaii na Bangladesh ula bit iaka jingpang COVID.

U Deputy Commissioner, West Jaiñtia Hills, u Ma Garod LSN Dykes ula ong ba baroh kiba wan sha ka jingïalang kila pynpaw ba ym dei ban kyrkieh ban plie iaka kad khaii na Tamabil Dawki LCS bad ula ong iaka kane un phah ka report sha ka sorkar.