WJDSA: Haka minit ba khatduh jop ka Ladthadlaboh iaka Sailung Ialong haka semifinal ba nyngkong ka Super Div

Syllad | The Rising MeghalayaDecember 4, 2023

Ka Ladthadlaboh Sc kala jop da 1-0 pyrshah iaka Sailung Ialong bad kane ka kol kala wan haka minit kaba khatduh lyngba u Promi Suting haka jingialehkai semifinal kaba nyngkong (qualifier) jong ka Super Division Football Tournament kaba pyniaid da West Jaintia District Sports Association (WJDSA) kaba long ha Kiang Nangbah Stadium haka sngi Nyngkong.

Kane ka jingialehkai kala long kaba iakhaid bha naduh ba sdang ha kaba kine ki arliang mamla kila pyni iala ka sur ialehkai kaba itynnad kaba la pynshongshit ia paidbah ba wan sakhi ia kane ka jingiakhun.

Kine ki arliang mamla kila iatynjuh bor markylliang ban ioh thep kol, hynrei ka bok ka nusip kaba noh shaka liang ka Ladthadlaboh kala ioh thep iaka kol haka por pynjlan iaki minit ialehkai kata haka 90’+1 lyngba u Promi kaba la biang pura iaka Ladthadlaboh ban jop bad rung sha ka final mynta ka aiom ialehkai.

Ka semifinal kaba ar ne ka eliminator kan long haka 5 tarik Nohprah hapdeng ka Niaw Wasa pyrshah iaka Nangbah Mulang. Kiba jop na kane ki jingiakhun kin ia aireng bad ka Sailung Ialong haka semifinal kaba lai haka 9 tarik Nohprah ban iaknieh iaka nam lahduh mynta ka aiom ialehkai.