Wh. Kambel Shullai “U Khai – U Piar ka Ri – ka Jaitbru”

Soolangki LalooJune 15, 2025

Kamwa pynkynmoo iow Waheh Kambel Shullai da kha ha ka 8 tarik Thohlakhmi (February) 1939 wei da ieh u yeini I pyrthai chongwasa ha ka 16 tarik Naiynru (June) 2012, hei lai luti heini ha sla khyndaw pyrthai kam u khynnah, u khynroo, u waheh daleh u chiboon ki kam kiwa mih nei sap I chemphang wa sarot iong-o, kam I chna ya ka Camera Chondur, I chna ya ki rot wa phylla hei por Behdeinkhlam, I pynmih pyrthai ya ka Khnap thangbru (Eco-friendly Crematorium) wa kiwi kiwi.

U Waheh Kambel Shullai toh sakhiat U Khai – U Piar ka Ri – ka Jaitbru, uwa da e sap kyrpang u Trekirot heiwa I sap wei chemphang iong o wow pynmih pyrthai ya ka Khnap thangbru nae Eco- friendly Crematorium man I kyrkhu wei burom wakhroo ya ka Ri wa ka jaitbru wei kawa e myntoi leh Liang wanang ya ki Bru wa pynemkam ya ka kamjooh yada ko leh yei man I long ka Rymaw heiwa neiliang ka Sorkar leh hadien I pynchong nongrim da tipmit Wei yaleh chooh chooh u pynkroo yei nam I pyrtuid iong o hakhmat ka pyrthai.

Kdar ha ki Khatle snem na chwa ym ye u mylliñ lyndet wa ynne ka sngi 16 tarik Nai Ynru man ko ka sngi wow sah kynmoo sah khanatang, ka sngi kawa u lyoh doom I sniawsih sniawdiaw ya ka yung ka sem, ya ki khon ka Raij Jwai wa kamjooh ya waroh ki khon ka Ri Le phaw Syiem- Khatar Dolloi wa hapyrdi wa dang dawa I por ka juk wow ioh ka pyrthai u sakhi u ioo yei sap Wei chemphang wa sarot kiwa man I kyrkhu wei myntoi ya ka imlang sahlang ieh syndet u Waheh Kambel Shullai yeini I pyrthai chongwasa.

Pynchongnia chongnongrim yei sap wa kyrpang iong u Waheh Kambel Shullai wow pynmih pyrthai ya ka Khnap Thangbru (Eco- friendly Crematorium), ïoo sakhiat waman I kyrkhu wakhroo ya ki khon ka Niamtre ha kylleiñ ki chnong ki thaw heiwa da pynsuk ya kawi pa kawi ka manyung wow pyndep ya ka niam ka rukom iong ka thang ka rin man da em I hap I oor, I pat rangbah rangsan. Ha lyndet ini iyi iyi waroh I kyrkhu wa daioh, Mih u Dak Jingkylli wow booh hei thij I pyrkhat iong ki khon ka niamtre, ka ri wa ka jaitbru, yi wan I kamram ki pateiñ, ka juk wache wastad wow pynkhroo chooh yei nam I pyrtuid u Waheh Kambel Shullai?

Eco-Friendly Crematorium dachna,
Kylleiñ ki Chnong ki thaw dabna.
Khmat Bru Kat wa ioo yei man iongka
Du kiwa yaroh yei sap iwa paka.

Chiboon kiwa niawliang niawtang
Ya ki Kam wasah wa yooluti wa Yang
I por Ïame wan ymchah de I,
Hukum Blai datoh wow lai neini.

Wh. Kambel Shullai Im I pyrtuid I nam ïongme

Chihajar Ngooh wei Sñiaw Makhane.