Wer ka MSOA ia ki paid ka Jylla ban wan iashim bynta sha ka 4th Sohra International Half Marathon

Syllad | The Rising MeghalayaJuly 8, 2025

Ka Meghalaya State Olympic Association (MSOA) ryngkat ka jingiatreilang ka Directorate of Sports & Youth Affairs bad ka Meghalaya Athletics Association (MAA) ki la pynbna ban pynlong ia ka 4th Sohra International Half Marathon ka ban long ha ka 27 tarik u Nailur 2025.

Haba kren sha ki lad pathai khubor haka 7 tarik Naitung, u DD Shira Director ka Tnad Sports & Youth Affairs, u Bah John F Kharshiing Working President ka MSOA bad u Bah Finely Pariat, General Secretary, MSOA ki la khot bad wer sngewbha ia baroh ki nongialehkai bad ia ki riew ieit sports na ka jylla Meghalaya bad shabar kumjuh ba kin wan iashim bynta ha kane ka jingiakop mareh

U DD Shira u la pynbna ba ia “Ka 4th Sohra International Half Marathon yn pynlong ha ka 27 tarik u Nailur 2025. Ngi kyrmen skhem ba ha ka jingpynlong ia kane ka jingiakop mynta u snem kan long kaba jop da ka jingiatreilang bad ki nongialam shnong bad ki Dorbar Shnong ka thain Sohra.” Nalor kata u la iaroh ruh ia ka ophis Sohra Sub Division, ki pulit bad kiwei kiwei ki tnad treikam halor ka jingkyrshan kaba ki la ai.

U Bah John F Kharshiing u la kyntu ia ki paidbah ka jylla bad na shabar kumjuh ba kin register ia ki kyrteng jong ki hapoh ka 10 tarik u Nailur 2025. U la ban jur ruh ba kane ka lympung ka thmu ruh ban kyntiew ia ka jingbit jingbiang ha ka met ka phad, ia ka jylla bad ia ka kam jngohkai.

Katba u Bah Finely Pariat ula ong ba ha u snem ba la dep, kila don haduh 7000 ngut kiba la wan iashim bynta ha kane ka marathon bad mynta u snem ki khmih lynti ba ki nongwan iashim bynta kin kot sha ka 10,000 ngut bad ula pynshlur ia ki nongshong shnong ka jylla ba kin wan iashim bynta.U pyntip ba kane ka jingiakop kadei ruh ka lad ban kyntiew ia ka Sohra kum ka jaka jngohkai kaba kongsan bad ula ong ba baroh ka song pisa na ka bynta ki khusnam ha kane ka jingiakop kan kot sha ka T.15.50 Lak.

Baroh ki jinglut jingsep kaba kynthup ia ka technical bad ka jaka sah, ka bam bad kiwei kiwei kan kot sha ka T.2 Klur bad ula ong ba kane ka Marathon kadei kaba baroh ki lah ban iashim bynta bad kadei ruh kaba ai ia ka khusnam pisa kaba heh. La pyntip ruh ba yn ym donkam bai rung na ka bynta ki nongshong shnong ka thain Sohra kiba wan iashim bynta ha ka jingiamareh sngewbha ne fun run.

Ha kane ka marathon kin don ruh buntylli ki jingiakop na ka bynta ki kynthei bad shynrang, kynthup ia ka 21K Elite Open and Meghalayan (na ka bynta kiba la 18 snem shaneng), ka 10K Open Race (ha ki rta ki bapher naduh 18 haduh 59 snem), bad ka jingiamareh kaba pawnam ka 5K ‘Run for Fun’. Yn ai khusnam kyrpang ia ki nongmareh kiba la palat ia ka 50 snem rta kiba iashimbynta ha ka 21K race, kaba pyni ba kane ka jingiakop ka pynshlur ia ka jingiashim bynta naduh ki rta ba dang rit haduh kiba la san tam.

Kane ka jingmareh kan sdang na Laitsohpliah kaba don 6 Km shakhmat jong ka jingkieng Mawkdok bad yn pynkut ha Mawsmai (Nohsngithiang Falls viewpoint). Khnang ban pynthikna ba kane ka jingiakop kan long kaba iaid beit iaid ryntih, ia ki surok kiban poi sha Sohra yn khang naduh ka por 6 baje mynstep haduh 10 baje mynstep ha ka sngi ba pynlong ia ka jingiakop. Nalor kane la pynkhreh ruh ia ki kali ban kit ia ki nongiashim bynta bad ia ki nongtrei ban leit ban wan na Shillong sha Sohra. Ki nongmareh kin hap ban mih na Shillong ha ka por 3 baje mynstep ban leit sha Laitsohphliah, ka jaka ban sdang kane ka jingiakop.

Ka jingpynrung kyrteng ne registration kan long online bad lah ruh ban leit register dalade ha ka ophis jong ka MSOA Office ha JN Stadium, Shillong bad ha Sohra Shop hajan ka Petrol Pump kaba don ha Lad Thanad.

Ka bai rung ka long T.1,000 ha ka 21K bad T.200 ha baroh ki 10K bad T. 50 ha ka 5K Run for Fun. Ka tarik kaba khatduh ban pdiang ia ka jingpynrung kyrteng kan dei ha ka 10 tarik u Nailur 2025.

Kumjuh ia ki T-shirts bad ki Bib Numbers na ka bynta ki nongiashim bynta ha ka 21K bad 10K yn sam ha ka 25 tarik bad 26 tarik u Nailur ha JN Stadium, Polo Grounds.

Ki nongiashim bynta ha ka 5K Run for Fun na Shillong bad kiwei kiwei ki jaka kiba marjan ki lah ban leit shim ia ki tiar ne Kits ha ka 26 tarik u Nailur na katei kajuh ka jaka, katba kito kiba na Sohra ki lah ban shim hi na Sohra ha katei kajuh hi ka sngi.