Weng noh ka Sorkar ia ki pulit na NEHU Campus hadien ba la bishar ia ka jinglong jingman: Dy CM

Syllad | The Rising MeghalayaApril 29, 2025

U Symbud Myntri Rangbah ka Jylla uba khmih ia ka tnad Home (Police), u Bah Prestone Tynsong haka sngi ba Ar u pyntip ba ia ki bor pulit la weng noh napoh ka campus jong ka skulbah North Eastern Hill University (NEHU) ha ka miet sngi Nyngkong hadien ba la bishar bniah ia ka jinglong jingman baroh.

Haba kren sha ki lad pathai khubor, u Bah Prestone u la ong, “Ngi la dep ban weng noh ia ki bor pulit hynnin ka miet hadien ba la bishar bniah ia ka jinglong jingman bad hadien ka jingiakren bad ka in-charge jong ka NEHU Campus.”

Ka NEHUSU ka la pynbna ia ka jingsangeh shong klas ba khlem buh pud bad pynlong ruh da ka jingiaid rally ba signature campaign ban pynpaw pyrshah halor ka jingkem ia u president jong ka u samla Sandy Sohtun bad halor ka jingpynap bor pulit hapoh ka campus hadien ka jingshah ktahkti jong u Assistant Professor na ka Hindi Dept u Dr Alok Singh.

Ki samla pule ki la kynthoh ruh ia ka tnad pulit halor ka jingwanrah bor pulit hapoh ka campus khlem ka jingioh jingbit na ki bor ba dei khmih jong ka skulbah.

Haba kylli, u Bah Prestone watla katta u la ong ba kam long satia kaba donkam satia ia ki pulit ba kin da pan jingbit na ka bynta ban rung hapoh ka campus jong kano kano ka ophis ne jaka pule ka Sorkar Pdeng ne Sorkar Jylla namar baroh ka shong ha ka jinglong jingman.

Ha kajuh ka por u Symbud Myntri Rangbah u la kyntu ruh ia ki samla pule ba kin ailad ia ka jingtohkit halor ka jingjia shah ktahkti ba dang shen jong u nonghikai ba kan iaid haduh ban da dep.

“Ngi la dep ban phah ia ka khubor kaba shai, ngi la kem ia u president ka NEHUSU halor ka nongrim jong ka jingmudui ejahar. Kumta ailad ban pyndep ia ka jingtohkit bad hadien ba la pyndep ia kane, baroh ki long laitluid ban leit sha ka iingkashari bad ka iingkashari kan shim ia ka rai kaba khatduh la kan ai bah jamin ne em. Kumta nga kyrpad ia ki samla pule ba kin ailad ban pyndep ia ka jingtohkit,” u la ong.

Haba kyntu ia ki samla pule ba kin kiar na kaba shim ia ka ain ha la ka jong ka kti, u Bah Prestone u la ong, “Ngim lah ban shim ia ka ain ha la ki jong ki kti namar kumba phi tip ba lada ka dei kaba shisha katkum ka jingmudui ejahar ba u Professor u la ngat ha ka jingshah ktahkti ha u president ne kino kino kumta ruh nga sngew ba ngi hap ban pynthikna ba baroh kiba don hapoh kane ka jylla ki dei ban don ha ka jingshngain.”