Weng kam ka KHADC ia 13 ngut ki nongtrei ba thung thymmai, pyndam thungkam pura ia 30 ki casual

Syllad | The Rising MeghalayaJune 4, 2025

Ka Executive Committee ba ialam da ka Voice of the People Party (VPP) ha Khasi Hills Autonomous District Council (KHADC) ka la weng kam noh ia 13 ngut ki nongtrei kiba dang shu thung thymmai bad pyndam noh ia ka hukum ban thungkam pura ia 30 ngut kiwei pat ki nongtrei casual hadien ba la thung ia ki khlem da don ki post kiba la mang ne sanction.

U Chief Executive Member (CEM) ka KHADC, u Bah Shemborlang Rynjah haba pyntip ia kane haka sngi ba Ar u la ong ba ia kane ka rai la shim da kaba pynshong nongrim halor ka kaiphod ba la aiti da ka Committee ba la thung da ka Executive Committee ban pynbeit ryntih ia ki jingtreikam jong ka Council.

U pyntip ruh ba ka committee kaba la shong haduh san sien ka la shong bishar bniah ia ka jingshakri jong ka District Council bad ha kane ka jingbishar ka la mih ka jingthung kam ia ki 43 ngut ki nongtrei. Na kine 13 ngut ki dei kiba dang shu dep thung thymmai bad 30 ngut ki dei kiba la thungkam pura hadien ba la thung ia ki kum ki nongtrei casual.

“Hadien ka jingbishar bniah, ngi shem ba kane ka jingthung kam ia ki la leh khlem da don ia ki kam kiba la mang,” ong u CEM da kaba bynrap, “Da kaba pynshong nongrim halor ka kaiphod ba la phah da ka committee, ka EC ka la shim ia ka rai ban pynsangeh noh ia ka jingshakri jong ki 13 ngut ki nongtrei kiba dang shu thung thymmai katba ha kaba iadei bad ki 30 ngut kiwei pat ki nongtrei casual kiba shah thungkam pura, ngi la rai ban pynkylla ia kane ka jingthungkam pura bad shah ia ki ba kin bteng ia ka jingshakri kum ki nongtrei casual.”

Katkum ka jingpynpaw ka jong u, kine ki 13 ngut ki nongtrei ba thung thymmai ki la sdang ban trei ha u bnai Naitung bad Nohprah jong u snem ba la dep kum ki constable ka tnad Enforcement, Peon, Mali, Cleaner bad kiwei kiwei.

Haba pynpaw ba ka pla tyngka ka KHADC kam long satia kaba biang, u Bah Shembor u la ong ba ia mynta hi ki don palat 70 ngut ki nongtrei kontrak bad ka jingsiew tulop la pyniaid na ka Administrative Charge kaba 5 percent jong ki skhim bapher bapher.

Na ka liang ka kynhun jong kine ki nongtrei kiba la shah ktah lyngba kane ka jingpynkylla hukum ki la leit ban iakynduh ia u CEM da kaba kyrpad ban pyrkhat biang ha kaba iadei bad kane ka rai.

Haba kylli, u CEM u la ban jur ba ka EC kan ym pynkylla shuh ia kane ka rai bad ong, “Mynta, ka shong ha ki la ki kwah ban bteng ne ban sangeh noh kum ki nongtrei casual.”

“Ngin bteng ruh ban leh ei ei pyrshah ia kito ki nongtrei ba la thung khlem da don ka kam kaba la mang,” u la pynbna. Nalor kata u CEM u la ong ba ka Committee for Administrative Streamlining hapoh ka Council kan sa shong bishar ruh halor ka jingdonkam ban pynkylla ia ka Service Rules.

“Ngi la rai ruh ban thaw ia ka Recruitment Committee khnang ban pynthikna ia ka jinglong shai ha ka thungkam thungjam hapoh ka Council,” u la bynrap.