Wat hapdeng u ‘lapbah khlem sangeh ki kam khaii drok, ioh kurup 458 gram u heroin na East Jaintia Hills

Syllad | The Rising MeghalayaMay 28, 2024

Wat hapdeng ka jingther jong u ‘lapbah bad ka jingsyllad ka lyer kaba jur ia kiba bun ki bynta jong ka Jylla namar u Cyclone Remal, pynban ki kam khaii drok kim shym la shongthait satia.

Kane ka la paw ruh hadien ba ka Tnat ANTF ka East Jaintia Hills ha ryngkat ki pulit napoh Lumshnong Police Station ha ka step phyrngab jong ka 28 tarik Jymmang ki la ioh ban kurup ia u drok heroin uba khia haduh 458 gram bad kem noh ia uwei u briew uba donkti.

Na ka liang u Superintendent of Police ka East Jaintia Hills, u pyntip ba ki bor pulit kiba la pynlong ia ka jingpynap shrip ki la ioh ban bat noh ia kawei ka Night Super Bus kaba don ia u  registration number AS 01 FC 8299 ha ka por kumba 1:30 mynstep.

Ki pulit hadien ba kila pynlong ia ka jingtalasi ki la lap haduh 42 tylli ki song sabon kiba don ia u kynja power na uwei u briew uba kyrteng u Abdul Kuddus Laskar uba dei napoh Cachar, Assam.

Hadien ba la leh ia ka test la shem ba u dei u drok heroin uba don ia ka jingkhia kaba haduh 458 gram. Ki pulit ki la kem noh ia une u briew bad rejistar case pyrshah ia u hapoh ki kyndon jong ka NDPS Act bad ka jingtohkit ka dang iaid shakhmat.