Wanrah nam ki Rang bad ki Thei ialehkai Kickboxing na ka jingiakop kaba la long ha Jharkhand

Syllad | The Rising MeghalayaAugust 31, 2023

Ki Rang bad ki Thei ialehkai Kickboxing ka jylla ki la wanrah ka nam ka burom ia ka jylla Meghalaya lyngba ka jingioh khur ia ki 5 tylli ki takma Ksiar, 2 takma Rupa bad lai ki takma Rnong ha ka lympung iakob ba la tip kum ka “Wako India National Kickboxing championship 2023 for Children Cadets and Junior Kickboxers” kaba long ha Ranchi, Jharkhand naduh 3 tarik haduh ka 27 tarik u Nailar mynta ka snem 2023.

Mar ia wan poi na katei ka lympung ialehkai la pdiang sngewbha ia kine ki Rang bad ki Thei ialehkai ka jylla la ha ka jingialang kaba kyrpang kaba la long hapoh Hotel Assembly, Shillong.

Ia kane ka jingleh burom ia kine ki khynnah bad ki samla la pynlong da ka Meghalaya State Kickboxing Association. Napdeng ki 20 ngut ki khynnah bad samla kiba leit shim bynta ha kane ka lynpung nalor kitei ki takma kiba ki la ioh ban khur, Ryan Mukhim 6 snem  rta ula ioh ia ka nam ‘Youngest Athlete’ ne u nongiashim bynta ba khynnah tam ha ka ne ka lympung iakop.

Kiba ioh rah ia ka Takma Ksiar ki kynthup ia u Heprit Isapynbiang Lyngdoh 8 snem  rta, u Heprit kyrshanlang Dkhar, i Reyana Syiemsad, u Banpynkhraw Warshong bad u Thangoulian Manlun. Kiba jop ia ki Takma Rupa ki kynthup ia u Gavin Albert Kharshandi bad u Winningstar Lyngdoh Nonglait, katba kiba jop ia ka Rnong ki kynthup ia u Caress Syad, u Mebankitbok Mynsing bad u Wansuklang Khyllep.

Ha kane ka jingialang ha Shillong la pynkup burom ia kine ki khynnah bad samla da u Vice President jong ka seng sain pythei United Democratic Party (UDP) u bah Alantry Dkhar uba long kum u kongsan ryngkat ka jingiadon lang u President ka Meghalaya State Kickboxing Association u Bah Larry Lorenzo Warjri, ki kmie ki kpa bad kiba haiing ha sem jong kine ki rang bad ki thei ialehkai Kickboxing.