Wanrah nam ka St. Anthony’s College na ka jingiakop National-Level “110 Hours Hackathon”

Syllad | The Rising MeghalayaJuly 4, 2025

Ka kynhun na St. Anthony’s College, Shillong ka la wanrah ka nam ka burom ia ka jylla da kaba wan ha ka kyrdan kaba ar ha ka jingiakop ba pawkhmat ha ka kyrdan jong ka ri (national level) ba la tip kum ka “110 Hours Hackathon”, ba la pynlong da ka Zoological Survey of India (ZSI), kaba long ruh shibynta ka jingkynmaw burom ia ka jingdap 110 snem ka jingseng ia ka ZSI.

Ka phang pdeng jong kane ka Hackathon ka long ‘Biodiversity and Climate Change.’

Napdeng ki 305 tylli ki kynhun kiba la pynrung kyrteng na kylleng ka ri, ki don 105 tylli kiba la shah jied ha ka wat kaba nyngkong, bud sa 16 tylli kiba rung sha ka semifinal ha kane ka jingiakop ba la pynlong ha ZSI Western Regional Centre, Pune.

Khatduh eh ki la don satang santylli ki kynhun kiba la rung sha ka final kaba la long ha Biswa Bangla Convention Centre, Kolkata ha ka 30 tarik u Jylliew 2025, ha kaba ka St. Anthony’s ka la jop ha ka kyrdan kaba ar halor ka project bathymmai ba la ai kyrteng “KremCare”.

Ia kane ka kynhun na St. Anthony’s College la ialam da u Dr. Damanbha Lyngdoh, Assistant Professor, Department ka Zoology kynthup ia u Thyanswer Challam, Associate Professor, Department of Biochemistry & Biotechnology bad u Saurabh Kumar Thapa, System Administrator, Computer Science. They were awarded second prize for their innovative project titled “KremCare”.

Kane ka jingiaid lynti jong ki ka la sdang da ka jingjop ha ka North Eastern Regional Centre, ZSI, Shillong kaba la long ha ka 23 tarik Jymmang ha kaba ki la jop ia ka nam lahduh. Hadien ki la mihkhmat ia ka thain ha ka jingiakhun semifinal ha ka Western Regional Centre, ZSI, Pune ha ka 9 tarik u Jylliew ha kaba ka kynhun jong ki ka la shah jied napdeng ki santylli ki kynhun ba rung final ban ia aireng ha Kolkata. Ha ka jingiakop kaba khatduh la sakhi ia ki kynhun na Jodhpur, Ladakh, Jabalpur, Digha bad Shillong.

Ka khusnam kaba nyngkong ka leit sha ka kynhun na Ladakh katba ka St. Anthony’s College ka la wan ba ar bad ka Digha ha ka kyrdan kaba lai.

Ka project kaba ka St. Anthony’s College ka la jop ka dei kaba la ai kyrteng “Meghalaya’s Hidden World: Biodiversity and Sustainability in Meghalaya’s Caves”, kaba la pynshong nongrim ha ka module kaba la khot Cave Sense. Kane ka tiar peit bniah kaba duna jinglut ka dei kaba la pynwandur ban iada ia ki jingthaw ba im kiba don hapoh ki krem ki kroh.

Ka project ka pynksan ruh ia ka jingiatreilang jong ki nongshong shnong ban pynthikna ia ka jingiashim bynta ha ka ban pynneh pynsah ia ki krem ki kroh.Ka app ka dei ka bynta jong ka jingthmuban pynneh pynsah kaba kham heh kaba la khot ‘KremCare,’ kaba thmu ban kyntiew ia ka jingiada kaba kham heh kaba la pyniaid da ki nongshong shnong ia ki jingdon jingem ba riewspah hapoh ki krem ki kroh jong ka Meghalaya.

Ki dkhot ka kynhun ki la wanrah ïa ki jingkhlain ba kyrpang jong ki ha kane ka projek ki kynthup ia u Bah Challam uba dei u biotechnologist uba la shemphang bha ha ka liang ka IoT applications ha ka biology; u Thapa ha kaba iadei bad ki system bad app engineer, Dr. Lyngdoh, u zoologist bad PhD ha ka biodiversity bad conservation. Katba u Dr. Lyngdoh u dei u stad wad bniah ba pawkhmat uba la pynmih shibun ki kot bad ki project wad bniah ha ka ri.

U Dr Lyngdoh u dei ruh uba la ioh pdiang buntylli ki khusnam na ka ri bad na shabar ri kumjuh, kata kynthup ia ka khsunam ‘Young Scientist Award’ ba la ai da ka Indian Society for Parasitology (2016), ka Sudev Bhusan Young Scientist Award da ka Zoological Society of India (2016), bad ka European Molecular Biology Organization (EMBO) Travel Grant to Greece (2023), nalor kiwei pat.

Ha ka sngi pynkut ia ka jingiakop la ia don lang u Bhupendra Yadav, Myntri ka Sorakr Pdeng uba khmih ia ka Tnad Environment, Forest and Climate Change kum u Kongsan ha ka jingiadon lang u Sushil Kumar Awasthi, IFS, Director General of Forests & Special Secretary, MoEFCC; ka Ms. Nameeta Prasad, Joint Secretary, MoEFCC; bad Dr. Dhriti Banerjee, Director, ZSI.

Kane ka Hackathon ka dlong shibynta jong ka Animal Taxonomy Summit, ka jingialang ba lai sngi kaba la long naduh ka 30 tarik Jylliew haduh ka 2 tarik Naitung 2025.