Wanrah ka EC-KHADC ia ka mang tyngka ba T.34.44 klur na ka bynta ki lai bnai

Syllad | The Rising MeghalayaMarch 27, 2025

U Executive Member ka Khasi Hills Autonomous District Council (KHADC) uba dei peit ia ka Tnad Tyngka, u Bah Seiborlang Warbah haka 26 tarik Lber u la wanrah  ia ka mang tyngka kaba T. 34,44,55,600 klur ban pynlut na ka bynta ki lai bnai ki ban wan ka ban sdang naduh ka 1 tarik Iaiong haduh ka 30 tarik Jylliew 2025.

Haba wanrah ia kane ka mang tyngka ha ka sngi kaba nyngkong jong ka dorbar mang tyngka u Bah Seiborlang u la ong ba kane ka mang tyngka ka long ban pynlut pynsep ha kaba iadei bad ki jingsiew sha ki MDC, bad ki nongtrei ka Council bad kiwei kiwei kynthup ia ka bai bam tymmen.

U pyntip ruh ba namar ba ka mang tyngka 2024-25 kan kut noh ha ka 31 tarik Lber, kumta ka Executive Committee kam pat lah ban wanrah ia ka mang tyngka ba pura jong u snem 2025-26 namar ka jingthmit jong ka por, bad kumta la wanrah shwa ia kane ka mang tyngka kaba tang lai bnai bad ia ka mang tyngka kaba pura yn sa wanrah ha ka sien shong dorbar ka ban wan.

Na kane ka mang tyngka kaba T.34.44 klur, T. 8,52,29,550 klur la mang sha ka General Administration Department, T.17,65,910 klur sha ka Law Department, T. 2,65,38,350 klur sha ka Revenue Budget & Finance Department, T. 2,57,05,470 klur sha ka Forest Department, T. 1,70,52,930 klur sha Administration of Justice & Judicial Department, T.  2,27,65,040 klur Legislative Department, T.3,87,640 klur sha Education Department, T. 15,82,93,940 klur Civil Works & Development Department bad T.1,67,16,770 na ka bynta ka Enforcement Scheme for protection of Tribal Land & Interest.