Wanrah jingkylla ka skim bylla 100 sngi haka shnong Sahsniang A angnud ban kyntiew sa ka kam jngohkai

Syllad | The Rising MeghalayaSeptember 20, 2022

Ka skim bylla 100 sngi ne ka Mahatma Gandhi National Rural Employment Guarantee Scheme (MGNREGS) kala wanrah jingkylla hapoh ka shnong Sahsniang A kaba hap hapoh ka Laskein C&RD Block, West Jaintia Hills District, katta ha kaba kala lah ban tyngkai iaka um bad ha kajuh ka por ban kyntiew iaka kam jngohkai.

Kane ka shnong kala thied iaka jaka na ki riew shimet bad hadien pat kala pan jingtrei na ka block na ka bynta ban pynneh pynsah iaka um bad ban ri dohkha ha ka jaka kaba don hapoh ka shnong Sahshniang A, kaba iahap ban ka mat treikam jong ka MGNREGS.

Kaba na kaliang ka block ophis ruh khlem pynslem kala mynjur ia kane ka kam kaba la sdang naduh u snem 2017. Ka projek tyngkai iaka um bad ban ri dohkha kala kot T.1 klur 13 lakh bad 430 ngut ki nongbat job card kila ioh jingtrei.

U Waheh Shnong Sahsniang A ma D Ymbon ula iathuh ba ka jingthmu ban pynbha ia kane ka jaka ka long na ka bynta ban thaw lad ban pynmih pisa lyngba ka kam ri dohkha bad ka kam jngohkai. Ula ong da ka pisa kaba mih nangne kin kyrshan ruh iaka skul kaba pyniaid ka shong ka Kymprup Higher Secondary.

U Deputy Commissioner, West Jaintia Hills District u Bah BS Sohliya haba kren haka jingplie paidbah ia kane ka projek haka sngi Nyngkong, ula ong ba ka jingjop kane ka skim ka dei ka jingiatreilang u nongshong shnong bad u kyrmen ba kane ka jingangnud ka shnong kan wanrah iaka jingmyntoi salonsar.

Kiba iadonlang ki kynthup ia u ADC bad Project Director DRDA u PK Boro, u MDC ka thain Habahun Dkhar, Rangdamon Dkhar Block Technical Assistant Laskeiñ C&RD Block, ki ophisar na ka tnad Fisheries nalor kiwei kiwei.