Wan shim jingkhein ki myntri ha Jowai halor ki jingshah pynjulor ha ki bor mariang

Syllad | The Rising MeghalayaJune 21, 2024

U Myntri ba dei khmih ia ka Tnat Revenue & Disaster Management u Bah Kyrmen Shylla ha ryngkat u Myntri sorkar tnad Animal Husbandry and Veterinary u Bah AL Hek ha ka 20 tarik Jylliew kila hiar ha Jowai na ka bynta ka jingialang bishar kam ha kaba iadei bad ki jingjia shah pynjulor namar ka jingther u ‘lapbah naduh kine ki khyndiat sngi ba la dep hapoh West Jaintia Hills District bad East Jaintia Hills District.

Haba kren ha ka jingialang bishar kam ba la pynlong hapoh conference room jong ka ophis u Deputy Commissioner, Jowai, u Bah Kyrmen Shylla u la ban jur ia ki Tnat sorkar ba dei khmih ba kin shim mardor ia ki sienjam haba jia kino kino ki jingjia shah pynjulor ha ki bor ka mariang ha ka jaka ban ap ia ki kynhun jong ka Tnat Disaster Mangement ba kin wan tuklar. U la ong ruh ba ka jingkloi ban tuklar da ki tnat ba dei khmih kan lah ban pynioh kloi ia ki lad jingiarap na ka bynta kito ki longiing kiba la shah ktah bad ruh ban lah ban pyniaid shakhmat ia ki kam maramot.

Katba na ka liang u Bah AL Hek u la pynpaw ba ka jingthmu ba kongsan ha kane ka jingwan jurip ka jong ki ka long ban bishar bniah halor ki jingjia shah pynjulor ba dang shen namar ka jingjur slap, kata naduh ki iing ki sem, ki surok bad kiwei kiwei, bad ruh ban pynkhreh mardor ia ki jingdonkam baroh bad ban pynpoi ia ki lad jingiarap hapoh ka 48 kynta sha kito ki longiing longsem kiba la shah ktah.

Na ka liang ki Deputy Commissioner jong ka West Jaintia Hills bad East Jaintia Hills, kata u Bah BS Sohliya, IAS bad u  Abhilash Baranwal, IAS ki la wanrah ia ka kaiphot kaba bniah ha kaba iadei bad kine ki jingjia shah pynjulor ba dang shen hapoh kine ki artylli ki district.

Da kaba pyntip ba kane ka jingther jong u slap naduh kine ki khyndiat sngi ba la dep ka la wanrah ka jingjulor ia ki surok bad ki jingkieng, ki la don ruh ki jingjia twa khyndew, ka jingshah pynjulor ki nar post ilektrik bad kiwei pat ki jingjia ia kiba ki bor district ki la shim mardor ia ki sienjam lyngba ki tnat ba dei khmih.

Nalor kata la pynpaw ruh ba ki jingjia shah pynjulor kim long kiba jur haduh katta katta ha baroh ki artylli ki district haba ianujor bad kiwei pat ki district ha ka Jylla, bad kam shym la don ruh kano kano ka jingduh jong ki mynsiem briew ha West Jaintia Hills lait noh ka jingiap jong uwei u briew hapoh ka shnong Sutnga East Jaintia Hills ha ka por ka jingwan syllad jong u Cyclone Remal ia ka Jylla.Ki la pyntip ruh ba kila phah mardor ia ki kynhun ba dei khmih halor kine ki jingjia hapoh kine ki district.

Ha kane ka jingialang nalor kine ki arngut ki DC la ia don lang ruh u SDO Amlarem Civil Sub-Division u Dr. Abhishek Saini, IAS, Bah M.B Tongper ADC,Jowai, Kong J Kharpuri, ADC, Khliehriat, Bah S Phanbuh bad Bah WK Kharbuli, Assistant Commissioner’s, Jowai, Superintendent of Police u Bah Chemphang Syrti, BDO Dr. B. Langbang, Thadlaskein C&RD Block lem bad kiwei pat ki heh ophisar na ki tnat bapher bapher.