Wan sha ka jingiakren iasuk katba ka jingkhang ka dang plie; ong u Bah Prestone iaka HNLC

Syllad | The Rising MeghalayaJanuary 25, 2025

U Symbud Myntri Rangbah ka Jylla uba khmih ia ka Tnad Home (Police) u Bah Prestone Tynsong ha ka 24 tarik Kyllalyngkot u la maham ba kan sa poi ka por ba ka jingkhang na ka bynta ka jingiakren iasuk bad ka seng Hynniewtrep National Liberation Council (HNLC)  kan sa khang khyrdep noh.

Haba jubab ia ka jingkylli halor ka jingpulom jong ka HNLC ban jubab ia ka jingkhot kaba bteng jong ka sorkar na ka bynta ka jingiakren iasuk, u Bah Prestone u la ong, “Lada ki (HNLC) kim sngewkhia bab jubab ia ka jingkyrpad ka jong ngi, aiu ngin ong pat, hynrei shah ba ngan pynkynmaw hangne ba ia kane ka jingkyrpad kam dei kaba leh tang da ka sorkar Jylla hynrei ruh lyngba ka Sorkar Pdeng. Kumta ka dang don ka por bad ka jingkhang ka dang plie ia ki ba kin wanphai pat sha ka jingiakren iasuk.”

Hadien ba la pynpaw ia kane, u Dy.CM u la maham ruh da kaba ong, “Hynrei, ka por kan sa poi ba ka jingkhang kan sa khang bad kan long kaba eh shibun ia ki ruh. Kumta, nga kyntu ia ki ba kin pyrkhat halor kane.Namar ba ka jingkhang ka dang plie, kan long kaba bha ba kin wan shakhmat sha ka miej jong ka jingiakren.”

Ka la iaid la palat shi snem naduh ba ka HNLC ka la weng noh ia lade na ka jingiakren iasuk ha u bnai Kyllalyngkot jong u snem ba la dep da kaba kynnoh ba ka sorkar kam shym la lah ban pynbeit ia ki santylli ki mat jingdawa jong ka kiba kynthup halor ka jingmab noh kyllum ia ki nongialam bad ki dkhot jong ka seng.

Haba kdew halor ka jingkynnoh jong ka HNLC ba ki pulit ki la pyndonkam da ki dkhot ba la pyndem wait jong ka pyrshah ia ka seng   bad ia ka jingialeh ka jong ka kum ka bym shisha, u Bah Prestone u la ong, “Kane ka long namar ba ngi la don lypa ia ka kynhun pulit kaba kaba treikam 24X7 bad kaba la ioh ia ka jinghikai kaba kyrpang bad kaba kyrpang bad kaba aiti ban pynthikna ia ka jingshngain jong uwei pa uwei u nongshong shnong ka Jylla.”

Haba kyntait ban kren ei ei halor ka jingpynbna paidbah ba dang shen jong ka HNLC ia ka manifestor jong ka, u Dy.CM u la ong, “Ka shong ha ki paidbah ban bishar, hynrei ka kamram jong ka sorkar Jylla ka long ban peit na ka bynta ki kam shongshngain bad ka jingshngain jong ki nongshong shnong ka jylla kumjuh ki briew kiba wan na bar kaba kynthup ia ki nongwan bei tyngka bad ruh ban pynthikna ban pynneh pynsah ia ka shongsuk shongsain.