Wan sakhi u rang siat khnam bna nam ka ri u Atanu iaka Meghalaya Games

Syllad | The Rising MeghalayaMay 5, 2022

Ka jingkynjah, ka jingkhuid ka lyer bad kynjah ka pyrthei ka mariang bad ka jingling ba kynjang bha jong ka jaka, kam lah ban khlem da khring ia kata ka mynsiem ka jong uwei na ki rang siat khnam ba la pawnam jong ka ri u Atanu Das ryngkat bad la u jong u coach u, u Mim Bahadur Gurung, tiap ki la lah ban ia don bynta ban ioh ban sakhi shipor bad ruh ba kin da iarap wat ban sam ia ka takma sha ki rang bad ki thei siat khnam jong ki synjuk ialehkai baher bapher ha ka lympung bah ialehkai Meghalaya Games kaba saw ba la long ha madan siat khnam jong ka SAI, SAG, NEHU haka sngi Palei.

U Atanu lei lei u la ioh ia ka jingpdiang burom kaba khraw bha na ki khynnah ialehkai jong ka jylla, namar ha kaba kut ka prokram sam ia ki takma, kim shym la pyllait shuh syndon ia u, hynrei man la ki nongialehkai, ki la pynieng beit marjan bad ki khnang ban ioh ban ia shon dur kum ka dak ban sah jingkynmaw, ia kane ka jingwan ia don lang ka jong u ha kane ka lymung iakob siat khnam ka Meghalaya Games.

Ka jingwan  poi ka jong u Mim Bahadur Gurung lem bad u Atanu Das, ka long kum shi bynta ka jingpynkhreh ba kyrpang jong u Atanu, shwa ba un leit ban mihkhmat  ia ka ri, ha ki lympung bah iakob siat khnam ne ki world cup kiban sa long nangne shakhmat.

Na ka liang President jong ka Archery Association of Meghalaya kong Matsiewdor War Nongbri, kala pynpaw ba kane ka jingwan ban ia don lang jong u Mim Bahadur Gurung bad u Atanu, ka long ka jingdonbok kaba khraw bad kaba la ai mynsiem ia ki khynnah ialehkai ba la wan ban iashim bynta sha kane ka jingiakob ha kane ka kynti kaba mynta, ia kaba  im lah ruh ban khlem da lamkhmat ban batai lyngkot iaka parom ka jingim ialehkai ka jong u Atanu, uba la don bynta bha la slem naduh ba u dang khynnah ha ka synjuk siat khnam bad uba la lah ban wanrah iaka nam bad burom ia ka ri na kiba bun ki lympung bah iakob siat khnam ki ri ka pyrthei.

Naka liang u Atanu, ha kaba sdang u sngew ban pynpaw iaka mynsiem kaba kmen ba un ioh ban wan ban kilan ne ban da saki syndon  iaka jingiashim bynta ki khynnah siat khnam ka jylla ha ka Meghalaya Games.

U Atanu u la bynrap shuh shuh da kaba ong ba u shem bad iohi ba ki khynnah ka jylla ki don shisha ha ki ia kata ka sap ba nylla ha ka  liang ka siat khnam, tangba u ong ba kaei kaba ki donkam ka long ki jinghap ban pynbiang ia ki jingdonkam naka liang ka sorkar khnang ba kin lah ban paw bad ban tyngshain ha ka jingim.

Katba naka liang u Mim Bahadur Gurung, u ruh u sngew ba u long uba donbok ban ioh ban ia don bynta bad sakhi ia ka jingiashim bynta jong ki khynnah ha kane ka Meghalaya Games.