Wan pynsngewthuh ka Red FM 93.5 Shillong iaka jingkongsan ka nang thoh nang tar ha Jowai

Syllad | The Rising MeghalayaJune 10, 2023

Ka Red FM 93.5 Shillong bad ka tnat treikam jong ka pule puthi hapoh ka jingpeit u State Project Director, SEMAM, Meghalya Shillong ryngkat ka jingïatreilang ka ophis treikam ka District Mission Coordinator, SSA West Jaintia Hills bad District School Education Officer, West Jaintia Hills haka sngi Palei ki la pynlong ïaka prokram kyrpang na ka bynta ki khynnah skul ha H.K.Singh Memorial Secondary School Jowai.

Kane kadei ka prokram ba la pynwandur kyrpang da ka Sorkar India halor ka thong jong ka NIPUN Bharat bad G-20 halor ka phang “Ensuring Foundation Literacy and Numeracy especially in the context of blended learning” bad latip ruh da kawei ka kyrteng ïa kane ka prokram kum ka “Janbhagidari Events and Activities” ha kaba ki nongïoh myntoi na kane ka prokram kin long ki khynnah skul ba pule ha ka kyrdan Pre-Primary haduh Klass III.

Kum ban maitphang ïa kane ka prokram la ïoh ka jingkren lyngkot na ka M Lakiang, DMC-SSA West Jaintia Hills bad pynbud pat sa ka jingpule ïaka NIPUN Bharat Pledge da baroh ki khynnah skul bad ki nonghikai katba ïaki kyntien kyrpang halor ka NIPUN Bharat la kren da ka Kong M.W. Lynrah, State Coordinator Pedagogy SEMAM-SSA, Meghalaya Shillong.

Ka Kong M.W.Lynrah haba ai jingkren ka la batai ïaki khynnah shaphang ka thong jong ka NIPUN Bharat ne ka National Initiative for Proficiency in Reading and Understanding with Numeracy bad kala ïathuh ruh ba ïa kane ka prokram la tip ruh kum ka Janbhagidari Events and Activities ïa kaba la sdang naduh ka 1 tarik Jylliew bad kan kut pat ha ka 15 tarik Jylliew.

Ka la ong haka Jylla Meghalaya la pynlong ïa kane ka prokram ha man ki District ha kaba ki khynnah kin ïoh jingmyntoi shibun lyngba ki prokram bapher ba kynthup ïaka Story Telling ïaki khynnah kiba pule ha ki UKG-LKG, Exhibition of TLM Mela, Bicycle Rally bad kiwei kiwei kiba lah ban khring ïaka pyrlhat pyrdaiñ jong ki khynnah.