Wan pyndem 2 ngut ki HNLC kiba wan phet na Bangladesh bym iahap ka rukom treikam
Arngut ki dkhot ka seng kieng atiar Hynniewtrep National Liberation Council (HNLC) kiba dei na Eastern West Khasi Hills District ki la wan pyndem noh ialade hakhmat u Superintendent of Police ka Eastern West Khast Hills District, Mairang ha ka 26 tarik Jylliew 2025 hadien ba ki la wan phet napoh Bangladesh.
Ia kine ki arngut la tip kyrteng kum u Dibarius Jyrwa 32, bad u Ridor Lyngdoh Nonglait 30 snem rta.
Une u heh pulit u iathuh ba ha ka jingiakren, kine ki arngut ki dkhot ka HNLC ki la kam ba ki la shah ialam bakla ha uwei u briew uba kyrteng u Samuel Wahlang Pahsyntiew ban pyniasoh ba kane ka seng ha kaba ryngkat lang ki la phet shapoh Bangladesh.
La iathuh ba u Samuel u dei uba la shah thwet ha kaba iadei bad ka Shillong Sadar Police Station Case No. 80(03)2024 U/S 120(B)/121A/307/324 IPC R/W Section 10/13/16/18 of UA(P) Act bad Section 3(a)/3(b)/5/6 of Explosive Substance Act (Kaba iadei bad ka jingbthei bom IED hapoh ka jaka ieng bus jong ka Shillong Syndicate).
U SP u la ong ruh ba kine ki arngut ki samla ki la phla ba ki don ia ka jingiadei bad ka HNLC bad ba la bynshet ha ki ban leh ia ki kam ki bym iahap dur satia, kata kynthup kiba iadei bad ki kam rep kam riang ia kaba ki sngew ba ka long kaba jngai na ka nongrim bad ka jingialeh jong ka seng.
La ong ruh ba kine ki la duh jingkyrmen bad kim sngewhun halor ka kam ba la bynshet ha ki lah palat 15 bnai kynthih hapoh ka jingkhmih da ki nongialam ba halor ka HNLC.
Kumta kine ki arngut ha ka 20 tarik Jylliew 2025 ki la rai ban phet krad noh napoh Bangladesh da ka jingthmu ban wanphai pat sha ka lynti kba dei ha ka imlang ka sahlang bad pynpaw ia ka jingbabe kaba jur halor ka jingleit pyniasoh bad kane ka seng kaba la shah khein beain.
U heh pulit u la ong ba ia kine ki arngut la kylli jingkylli bad ia ki jingphla jong ki la rekod bad la pynshong ia ki ha ka jaka kaba kyrpang katba ki dang pynkhreh ban leh ia kaba donkam baroh.
Facebook
Instagram
Youtube
Twitter
Leave a Reply