Wan poi ka Sonam bad ki sawngut yn ialam tian bishar hakhmat ka iingkashari ha Shillong 

Syllad | The Rising MeghalayaJune 11, 2025

Ka Sonam Raghuvanshi ka la wan poi mynta ka miet ha ka Nongbah Shillong bad na ka liang ki pulit kin sa ialam tian bishar ia ka kumjuh ia ki saw ngut kiwei pat kiba donkti halor ka jingshah pyniap u Raja Raghuvanshi hapoh ka Iingkashari.

U Superintendent of Police (SP) ka East Khasi Hills, u Bah Vivek Syiem haka 10 tarik Jylliew u la ong ba ia ka Sonam Raghuvanshi lem bad ki sawngut kiwei pat ki suba donkti halor ka jingshah pyniap u kurim jong ka u Raja Raghuvanshi yn wanlam hakhmat ka Iingkashari haka 11 tarik Jylliew.

“Ngi la ioh bor ban wanlam ia ki na Indore (Madhya Pradesh) na ka bynta hynriew sngi bad na Ghazipur (Uttar Pradesh) na ka bynta lai sngi. Ka kynhun na Indore kan wan poi lashai ka step sngi Balang bad ka kynhun na Gazipur kan wan poi ha ka por mynmiet. Ngin wanlam ia baroh kine ki suba donkti hakhmat ka Iingkashari lashai ka sngi bad hadien ngin pan ban pynlong ka jingtohkit- kata kadei ka bynta kaba bud,” ong u SP haba kren sha ki lad pathai khubor.

Ia ka Sonam la ioh ban kem noh na Uttar Pradesh hadien ba ka la wan pyndem ia lade ha Nandganj police station ha Ghazipur district, katba ia ki sawngut kiwei pat, kata u Raj Khuswaha (21), Akash Rajput (19) na Lalitpur, u Vishal Singh Chauhan (22) bad u Anand Kuli (23 snem rta) la ioh ban kem noh na Indore.

Une u heh pulit u pyntip ruh ba ka kynhun Special Investigation Team (SIT) kan ap ia ka rai lano kin ialam ia baroh kine kiba la shah kynnoh donkti ha kane ka kam pyniap sha kshaid Weisawdong na ka bynta ban pynwandur biang ia ka kam pyniap kaba ki la leh.

U Raja u la shah pyniap noh naduh ka 23 tarik u Jymmang ba la dep ha kaba ia ka metiap ba la sdang pyut jong u la lapdien na ka jaka riat hajan ka kshaid Weisawdong ha ka 2 tarik u Jylliew.

U Bah Vivek u la pynpaw ruh ka jingsngew skhem ba kin lah ban pyndep ia ka chargesheet tang ha ka por kaba lyngkot.

“Hooid, Nga kyrmen ban chargesheet ia kane ka case ha ka por kaba lyngkot eh. Ka SIT ka la kut jingmut ba tang hapoh 7 sngi ngi la ioh ia ki sakhi satar kiba biang ban kem ia ka. Ha ki sngi ki ban wan, ngin sa nanglum shuh shuh ia ki sakhi satar bad pynthikna ba ngi don ia ka case kaba khlain,” u la ong.

U SP u la ong ba kane ka kam pyniap ka dei kaba la iasylla bha, hynrei la ki thikna ne em ha kaba iadei bad ka jaka (Weisawdong) yn dang pynthikna.

“Katkum ka jingiathuh jong ka Sonam, kam pat ju wan satia sha Shillong, hynrei ki don ki khubor kiba ong ba ka la ju wan teng. Ngin dang pynthikna ia kane bad hadien ka jingtohkit ngin la lah ban tip la ka dei ma ka kaba jied ia ka Weisawdong namar ka tip ia ka jaka,” u la bynrap.

Katkum ka jingong ka jong u, baroh kine kiba shah kynnoh donkti ki la mih na Sohra hadien ba ki la dep ban leh ia ka kam pyniap bad bret ia ki phone bad ki Sim Card jong ki.

“Hynrei, ka dei ka jingshisha ba ka Sonam ka la iakren bad u Raj ha katei ka sngi bad u Raj u la iakren ia ki laingut kiba donkti ha kane ka kam pyniap,” ong u heh pulit da kaba bynrap ba ki pulit kin dang pynthikna halor ka pisa ba la siew sha kine ki runar na ka bynta ban leh ia kane ka kam pyniap.

Haba kylli, u Bah Vivek u la ong ba ki dur ba la ioh lyngba ki CCTV ki la iarap shibun ha kaba iadei bad ka jingtohkit bad kaba lam ruh sha ka jingioh kem ia kine ki briew kiba shah kynnoh donkti.

“Dei na kata ka daw ba ngi la kyntu ia ki Homestay bad ki jaka kiba bun ki nongwan shangkai ba ki dei ban don ia ki CCTV namar ki sakhi kiba rit eh ruh ki lah ban long ka jingiarap kaba khraw,” u la ong.