Wan poi ka Dkar ha ïing briew ha Jowai

Syllad | The Rising MeghalayaJune 26, 2020

Kawei ka Dkar kaba la tip kum ka Keeledbox Turtle kala wan poi ha phyllaw jong ka iing briew hynne ka step ha Jowai, ka district headquarter jong ka West Jaintia Hills District.

Kane ka Dkar (Keelebox Turtle) kala wan poi ha iing sah jong u ma HH Mohrmen, uwei na ki nongthoh columnist, uba long ruh u Environmentalist ha Riatsasim, Iawmusiang, Jowai.

Ka khun jong u ka Melanie Passah kala lap bad pyllait ia kane ka Dkar bad la aiti ha ka tnad kam khlaw Wildlife Division Jowai. La wan ban shimti ia kane ka dkar da u ma S Law, Range Forest Officer, Umkiang.

Kine ki jait Dkar ka dei kaba mrad kiba lah ban im ha um bad ha ryngkew bad la suba ba ki im sah ha ki khlaw ba marjan ba don ki wahduid ha katei ka jaka.

Kane ka jaka ba sah u Ma HH Mohrmen, kadei ka jaka kaba ka JHADC kala pyrshang ban ai jingiada iaki khlaw ki btab, hynrei mynta pat la dap da ki iing briew bad sah satang katto katne ki bynta ba dang don ka khlaw ba ki wah duid kiba dang khuid dang suba kiba tuid sha Wah Myntdu.

Ka Heisa Lato, DFO Wildlife Division, Jowai kala ong kine ki Dkar- Keeledbox Turtle ki don ha kylleng ka ri India, hynrei ki hap haka thup jong ki mrad bala jan duhjait haka International Union for Conservation of Nature (ICUN).

“Ngin hap ban wad bniah kumno kane ka dkar ka wan poi ha kane ka iing,” la ong ka Kong Heisa bad ka ong ba ha ka kane ka jingkhang khyrdep ban iakhun iaka khlam COVID-19 bun jait ki ba kyrpang bad kiba la jan duhjait la ioh pyllait hapoh ka District bad kine ki kynthup wat iaki skei, ki khla.