Wan plie u Kyrmen Shylla iaka skul thymmai – ka God’s Glory English School ha Mihmyntdu

Syllad | The Rising MeghalayaSeptember 7, 2025

U Myntri Sorkar uba long ruh u MLA ka Khliehriat u Bah Kyrmen Shylla haka 6 tarik Nailur ula plie paidbah iaka skul thymmai kaba kyrteng ka God’s Glory English School kaba don ha Moowamon Mihmyntdu, pyrshah ka ophis u DTO Jowai.

Kane ka skul ka die kaba la seng da ka Kong Shimti Shylla.

Nalor u Ma Kyrmen Shylla la ia donlang ruh u Deputy Chairman ka JHADC Ma Wailaddame Shwa Siangshai kum u symbud kongsan, ki MDC ka JHADC ba kynthup u Ma Rikut N. Parien bad Ma Gresentus Susngi, u Chief Adviser Dr. Prince Stone Shylla nalor kiwei kiwei.

U Ma Kyrmen u pynpaw ba mynshwa u don ka jingthrang jingangnud ban seng ia kawei ka skul, hynrei hadien ba ula shah jied kum u nongmihkhmat paidbah ka jingmut jingpyrkhat jong u, ka kylla noh namar ba u iohi ia kiba bun ki skul kiba la don lypa ki donkam shibun ka jingiarap bad kumta ula buh jingmut ba haka jaka ban seng skul thymmai kan bha ba un aijingiarap ia kito ki skul kiba donkam shisha ka jingiarap.

Ula pynpaw ruh ka jingsngew kmen ba hapoh ka East Jaintia Hills District da ka jingiasngewthuh jingmut lang ki Ar MLA bad u DC kino kino ki skul kiba pynsngew ia kino kino ki jingeh, ki lah ban ioh jingiarap lyngba ka DMF Fund khamtam haka ban moramot iaki iingskul bad pynioh ruh iaki kor computer.

Kum ka jingsdang jong ka skul, u Ma Kyrmen Shylla ula kular ban pynioh 5 tylli ki kor computer naka bynta ban ai jinghikai iaki khynnah katkum ka jingiaid kajuk ka por mynta.

U Ma Kyrmen Shylla haka jingkren u kitbok kitrwiang bad kyntu iaki nongseng bad nongpyniaid skul ban long kiba iaishah bad trei shitom, namar kam long kaba lah, ba mynta yn sdang lashai yn ioh noh ban kheit ia u soh.

U Ma Wailaddame Shwa Siangshai ula ong lyngba kane ka skul ki khynnah kin ioh ia shibun ki jinghikai kaba long kum ka jingpynkhreh na ka bynta ban iakhun iaka jingim bad ka lawei ka jong ki. Ka jingsdang iaka skul ymtang ban sam iaka jingnang jingstad haka liang ka pule puthi hynrei ban hikai ruh iaki haka liang ka akor ka burom.

Ula ong ruh ba ka jingsdang iaka skul ka long thik kumba thung iaki symbai siej ha kaba hapoh 5 snem ym pat lah ban iohi iaka jingkylla namar ki iaksaid napoh khyndew ban heh ban san kumjuh ruh kane ka skul hapoh ki 5 lane 10 snem jong ka jingiaid lynti ka lah ban ym kiew hynrei tang ka jingiai shah bad jingtrei shitom shisien ka sngi kan sa pyni iaki dak ki shin ki ban long ka burom iaka rilum Jaintia hi baroh kawei.

U Ma Rikut N. Parien ula ong, ula iaroh iaki nongseng iaka skul namar kajuh mynta bun na ki nongshong shnong ki iakhun naka bynta ka jingmyntoi shimet ym na ka bynta ka bha ka mait ka imlang sahlang. U kyrmen skhem ba lyngba ka jinglam lynti jong U Blei ka jingangnud jingthmu jong ki nongpyniaid, kane ka skul kan kiew na kawei ka kyrdan sha kawei ka kyrdan.

Na kaliang u Ma Gresentus Susngi ula ong ba ka jingdon jong kane ka skul kan pynsuk iaki khynnah kane ka thain bad ai ruh ula ai ka jingkitbok kitrwiang ba kane ka skul ba kan ïaid shakhmat haka jingshakri iaki khynnah skul ha ryngkat ka akor ka burom bad ka tip briew tip Blei.

U Chairman ka skul Ma Piwell Shylla ula pyntip ba ka Joint Director School Education & Literacy, Government of Meghalaya kala ai jingbit ban plie iaka skul naduh Class Tiny Tots haduh Class V bad ka admission na ka bynta u snem 2026 kan plie naduh ka 8 tarik Nailur.