Wan plie u Dr. WR Kharlukhi iaka jaka thang iap mynsaw ka Seinraij Jowai

Syllad | The Rising MeghalayaJune 7, 2025

U MP ka Rajya Sabha u Dr Wanweiroy Kharlukhi haka 6 tarik Jylliew ula plie iaka Khnap Thang Briew (Iap Mynsaw) ne ka Kambel Shullai Eco Friendly Crematorium jong ka Seinraij Jowai kaba don ha Khloo Paiung (Seiñraij Reserve Grove).

Hadien ka jingplie iaka Khnap Thangbriew kala don ka jingialang lyngkot ha iing Dorbar ka Seinraij Jowai ha Loomptrdi Iongpiah ha kaba la ioh ka jingkren pdiang burom na u president ka Seinraij Jowai Ma Hercules Toi.

U Ma Arwotki Sumer General Secretary ka Seiñraij haka jingkren ula ong, kadei ka sngi sah jingkynmaw iaki khun ka Seinraij Jowai haba la ioh ban plie iaka Khnap Thangbriew na ka bynta ki khun ka Niamtre kiba khlad mynsaw na ki jingjia ki bym poi pyrkhat.

Ula pyntip ba ia kane ka Khnap la shna haka jinglut kaba 20 lak tyngka lyngba ka MP Scheme ba la iarap da u Dr. Kharlukhi jong u snem 2023-24.

Ula pynkynmaw ruh ia u Ma Kambel Shullai uba la wad ki lad ki lynti la bun tylli ki snem kumno ban pynwan dur iaka Khnap Thang briew khnang ban pynsuk iaka pateng bad ban pynneh iaki dieng ki siej.

Nalorkata ula pynkynmaw ruh ba hashwa ban don ka Khnap Thangbriew shwa u snem 2001 haba pyndep iaka niam Thang la hap ban pom artylli ki dieng kseh hynrei mynta tang uwei u dieng kseh la lah ban pyndep iaka niam Thang na ka bynta ki 50 ngut ki briew.

Katba ka liang u Dr. Kharlukhi kum u kongsan u pynpaw ka jingsngew sarong iaki longshwa manshwa kiba la seng iaka shnong Jowai namar ki long ki riew rangbah kiba stad bad iohi jngai la ka long na ka bynta ka jingbha jingmiat jong ka imlang sahlang ne wat haka synshar khaddar paidbah.

Ha kane ka sngi la ioh ruh ka jingnguh blei na u MA Wandao Lakiang, u Maji ka Raij Jowai, ki kyntien khublei na u Wyraiki Kharbuki Assistant General Secretary ka Seiñraij bad ki jingrwai na ki khun samla ka Seiñraij.

Hadien ka jingialang kum shibynta ka sngi iada mariang, ka Seinraij Jowai kala pynlong ruh iaka jingthung dieng ha Biar Ka Blai ha kjat u Loom Mookhai.