Wan nyngkong ka Khad Ar Daloi Law College haka result LL.B

Syllad | The Rising MeghalayaJuly 30, 2019

JOWAI: Ka Khad Ar Daloi Law College, Jowai bad ka Shillong Law College, Shillong kila long ki ar tylli ki shlem pule kiba la ïohknieh ïa ka kyrdan ba nyngkong bad ba ar ha ka eksamin LL.B kaba ka result la pynbna da ka North Eastern Hill university (NEHU) haka 26 tarik une u bnai.

Ka Sawaka Kynjing, ka kaba pule ha Khad Ar Daloi Law College, Jowai ka la ïoh ban knieh ïa ka kyrdan banyngkong eh ha kaba kala ïoh 63.27 pc bad ka Kajol Gurung kaba ioh 60.5 pc kaba na ka Shillong Law College kala wan haka kyrdan ba ar ha kane ka eksamin LL.B 6th Semester kaba long ha u bnai Jylliew 2019.

Ha kane ka kynti ki don haduh 126 ngut kiba ïakhun ïa kane ka eksamin ba pyniaid da ka skul bah NEHU. Ka Sawaka bad ka Kajol kila wan haka kyrdan First Division, 22 ngut kiba pass haka Second Division bad ka pass percentage jong kane ka ekesamin kalong 19.05 pc.

Ka Sawaka Kynjing ka dei khun jong ka Kong Maygie Kynjing bad u Dr. George Passah ba sah ha Mynthong Jowai, West Jaiñtia Hills District.

Ka kong Rimaya Manar, Principal Khad Ar Doloi Law College Jowai kala iathuh ba kane ka college haka jingaid lynti kaba 33 snem ka jingshakri kala sei shibun ki muktiar na Rilum Jaiñtia bad ha kane ka kynti kala rung syndon ha kane ka kyrdan kaba nyngkong da ka jingpass bha jong ka Sawaka Kynjing.

Ka Khad Ar Daloi College bad ka College Committee kila ai khublei ïaka Sawaka Kynjing kaba la wanrah ïa ka nam ka burom jong ka College bad ka Rilum Jaiñtia baroh kawei bad ki kitbok kitrwiang ba kan nang iaid shaphrang bad jop haka pule ka puthi jong ka.