Wan jurip u Myntri PHE iaka skhim um Jal Jeevan Mission ha Barato bad Thangrain

Syllad | The Rising MeghalayaFebruary 17, 2022

U Myntri ka tnad PHE u Bah Renikton Lyngdoh Tongkhar haka sngi ba Ar ula wan hiar jurip dalade ïaka jingtei ïaki artylli ki projek sam umbam umdih na ka skhim Jal Jeevan Mission (JJM) haka shnong Thangraiñ bad Barato, West Jaintia Hills District.

Ha kane ka jinghiar jurip u Bah Renikton la iaodnlang u MLA ka thain Ma Nujorki Sungoh, ka Kong R Kynjing Executive Engineer RWS Division Jowai, u Ma S. Najiar SDO Sub-Division, PHE Jowai bad ki katto katne ki riew rangbah jong ki ar tylli ki shnong.

U Myntri ula leit ban jurip nongkong ïaka jingtei ïaka Thangraiñ Combined Water Supply Scheme kaba la tei haka mang tyngka kaba 9,27,40,000/- bad kan ai jingmyntoi ïaki 432 tylli ki thliew iing ka shnong Thangraiñ.

Ïaka um la tan na ka tyllong kaba tip kum ka Umbuit haka jingjngai kaba 13.00 km haduh ka jaka ba buh ïaka Water Treatment plant.

Hadien kane u Myntri ula leit jurip sa ïaka Barato Water Combined Supply Scheme kaba la tei haka mang tyngka kaba 2,20,96,000/- bad ki longïing ki ban ïoh jingmyntoi ki don 634 tylli bad ïaka um la tan naka tyllong um kaba don haka shnong Pammanik kaba jngai 19.00 km na ka Water Treatment plant.

U Myntri haba kren bad ki nongthoh khubor ula ïathuh ba ka jingpyntrei ïa kine ki artylli ki projek ki la ïaid shait shait ha kaba ka Barato Water Combined Supply Scheme ka jingtrei ka la dep 90 na ka 100 katba ka Thangraiñ ka jingpyntrei ka long 10 na ka 100.

“Ngi sngewthuh ba kin don katto katne ki longïing ki bym pat pynrung hapoh kane ka skhim bad na ka liang ka tnad kala leh la ka jong ka bynta ban shna ïaka estimate kyrpang na bynta jong ki khnang ban lah pynthikna ba baroh ki thliew ïing kin ïoh ïaka umbam umdih katkum ba kidei hok ban ïoh,” la ong u Bah Renikton.

Ula shuh shuh ba wat la ïaka um la tan na ki tyllong kiba jngai hynrei nga kyrmen ba ki paidbah kin ïoh um lynter namar ha kine ki artylli ki projek ngi ïoh ïaka Gravity Source ha kaba ka um ka wan hi ym kum kiwei ki jaka ba dei da ka Pumping bad mih ki daw jong ka jingduh bording ne sniew ki pump.

Ula ong ruh ba ka shnong Barato kan pynkhreh ïaka jingiaseng synod bad ka jingdawa ka long kaba kham kyrkieh bad donkam ban pyndep ia kane ka projek umbam haka por kaba la buh bad la kyntu iaki kontraktor ban shimkhia ban trei shitom ban pyndep shuwa ka jingiaseng ban myntoi u nongshong shnong.

Shuh shuh haba kren haka jingplie iaka fete shnong ka Shilliang Myntang, u Bah Renikton ula pynbna ba iaka umbam umdih ka shnong Shilliang Myntang la mang T.10 Klur bad shen yn sdang noh ka jingtrei.