Jurip kyndit u DyCM ia ka jinglong jingman ka Khyndailad ha ka por mynmiet

Syllad | The Rising MeghalayaJuly 10, 2025

U Symbud Myntri Rangbah ka Jylla u Bah Sniawbhalang Dhar uba khmih ia ka Tnad Urban Affairs haka sngi Balang u la pynlong ka jingjurip kaba kyndit ia ka Khyndailad ban khmih bniah ia ka jinglong jingman jong kane ka jaka khaii pateng kaba don hapdeng jong ka sor Shillong.

Kane ka jingwan jurip ka long khamtam ban bishar bniah ia ka jinglong shngain bad ka jinglong jingman jong kane ka jaka ha ka por mynmiet bad kaba la kylla long ka jaka kaba khring shibun ia ki nongwan shangkai pyrthei.

Ha kane ka jingjurip u Bah Sniawbhalang u la iakren ruh ia ki nongshong dukan madan kumjuh ki riew paidbah kynthup ia ki nongwan shangkai pyrthei kiba dang pynlut por ha kaba bam ia ki jingbam ba la shet hi.

Nalor kata u la thied bad mad ruh ia ki katto katne ki jingbam ba la die ha kine ki lynti surok ha ka thain Khyndailad.

U Dhar u ban ban jur ba ka jingdon jong kiba bun ki briew ha ka thain Khyndailad ha ka por mynmiet ka dei ka sakhi kaba pyni ba ka Shillong bad ka Jylla Meghalaya ka dei ka jaka kaba shngain. U la ai ruh ka jingiaroh ba ki nongshong shnong abd ki nongwan shangkai pyrthei ki sngew shngain ban ioh ialehkem leh sngewbha ha ka por mynmiet.

U Symbud  Myntri Rangbah u la kdew ba ka jingshaniah jong ki paidbah ha ka Sorkar ka paw lyngba ka jnglong la kloi ka jong ki ban ia mih bad ialehmen leh sngewbha ha ka por mynmiet. U la ong ruh ba kane ka dei ka dak kaba pyni ia ka jingpyrshang borbah jong ka sorkar ban khmih ban pynneh ia ka shongsuk shongsain hapoh ka jylla.

Katkum ka jingong ka jong u, ki sienjam ba la shim da ka sorkar ban pynthikna ia ka jingshngain bad ban sakhi ia ki jingialeh kmen na ka bynta ki nongshong shnong bad ki nongwan shangkai pyrthei kumjuh ka la iarap shibun ban pynlong ia ka nongbah Shillong ba kan nangpaw pyrthei kum kawei na ki jaka jngohkai.