Wan jngoh u ADG ka BSF ia ka Jylla ban khmih ia ka jinglong pynkhreh ha khappud India-Bangladesh

Syllad | The Rising MeghalayaJune 2, 2025

U Additional Director General (ADG) BSF Eastern Command u Mahesh Kumar Aggarwal u la pynkut noh ia ka jingwan jngoh ba saw sngi ia ka Meghalaya Frontier ban bishar bniah ia ka jinglong jingman bad ka jinglong ba la pynkhreh ha shilynter ki jaka khappud ka Jylla.

Ha kane ka jingwan jngoh ka jong u, u Aggarwal u la leit jurip ia ki Border Outposts (BOP) ha West Jaintia Hills bad East Khasi Hills District bad iakynduh ruh ia ki shipai BSF da kaba ai khublei ia ka jingtrei borbah bad ka jingaiti lut ka jong ki watla ki la hap ban trei ha ki jaka kiba eh bad ka jinglong jingman jong ka suinbneng.

Na ka liang u Inspector General ka BSF Meghalaya Frontier, O.P. Upadhyay u la ai ki jingbatai bniah sha u ADG halor ka jinglong jingman kaba mynta ha ki thain khappud. Ki jingiakren ki kynthup ruh halor ki jingpyrshang borbah ban khanglad ia ki kam khaii beain kiba dang shen, ki rukom treikam jong ki shipai, ka jingkhanglad ia ki kam wan rung tuh bad ka jingiatreilang bad ki bor synshar shnong.

U ADG u la ai ka jingiaroh ia ka jingjop jong ki shipai BSF ha ka ban tehlakam ia ki kam beain ha shilynter ki jaka khappud jong ka ri.

Haba kren sha ki ophisar shipai ha kane ka jingwan jngoh ka jong u, u Aggarwal u la ban jur halor ka jingkongsan ban long kiba husiar, ka jinglong ba tbit, ka jngsngew skhem. U la ban jur ruh ia ka jingdonkam ban pyniaid shakhmat ia ki prokram kiba iadei na ka bynta ka bha ka miat jong ki paidbah nongshong shnong khnang ban tei ia ka jingshaniah bad ka jingiatreilang ha ki thain khappud.

Nalor ka jingpeit bniah ia ki jaka puta, u ADG u la pynlong ruh ia ka jingialang kaba kongsan bad ki heh pulit ka Jylla ban pynkhlain ia ka jingiatreilang hapdeng jong ki. U la pynlong ruh ka jingleit iakynduh ia u Lat ka jylla hapoh Raj Bhavan, Shillong da kaba pyntip sha u halor ki kam shongshnain bad ki lad jingiada jong ki shipai BSF.

U Agarwal u la iakynduh ruh ia u Chief Secretary u Bah DP Wahlang ban iakren halor ka jingpyniaid ia ki kam ha ki jaka khappud, ka jingiatreilang hapdeng ki BSF bad ki bor sorkar bad ka bynta jong ki tnad ka sorkar jylla ha ka ban aijingkyrshan ia ki jingpyrshang ban iada ia ki jaka khappud jong ka ri.

Ka BSF ka la pynskhem biang ia ka jingangnud jong ka bynta ka jingshngain ki jaka khappud da kaba kyrshan ruh halor ki kam pynroi bad na ka bynta ka bha ka miat jong ki nongshong shnong kiba shong ba sah ha ki jaka khappud.